Պուտինը և Օբաման քննարկելու են Ուկրաինայի, Իրաքի և Սիրիայի իրադրությունը

Ռուսաստանի և ԱՄՆ-ի նախագահներ Վլադիմիր Պուտինը և Բարաք Օբաման առաջիկա օրերին պլանավորում են քննարկել ուկրաինական թեման, Իրաքի և Սիրիայի իրադրությունը: Այդ մասին հունիսի 20-ին Մոսկվայում կայացած ճեպազրույցում լրագրողներին հայտնել է Ռուսաստանի ղեկավարի օգնական Յուրի Ուշակովը:

«Առաջիկա օրերին պլանավորվում է անցկացնել Օբամայի հետ Պուտինի հեռախոսազրույցը՝ շեշտը դնելով ուկրաինական թեմայի վրա, կքննարկվեն Իրաքի և Սիրիայի իրադրությունը»,-ասել է Ուշակովը:

«Օբաման և Պուտինը շփվել են Նորմանդիայում տեղի ունեցած հանդիսությունների ժամանակ, և նրանք երկու անգամ խոսել են այդ միջոցառումների ընթացքում, պայմանավորվածություն է ձեռք բերվել, որ նախագահները կունենան նաև հեռախոսազրույց, և այժմ այդ պայմանավորվածությունն իրականացվում է»,- հավելել է Ուշակովը:

Ինչպես արդեն տեղեկացվել է, Ռուսաստանի և Ուկրաինայի նախագահներ Վլադիմիր Պուտինը և Պյոտր Պորոշենկոն հունիսի 19-ի եցեկոյան կայացած հեռախոսազրույցի ընթացքում քննարկել են Ուկրաինայի արևելքի իրադրությունը: Պուտինը կարևորել է կրակի դադարեցումը Ուկրաինայի հարավ-արևելքի կոնֆլիկտային գոտիներում՝ հակամարտության կենսունակ կարգավորման հասնելու նպատակով:

Հունիսի 19-ին ավելի վաղ Պուտինը հեռախոսազրույց է ունեցել Գերմանիայի կանցլեր Անգելա Մերկելի և Ֆրանսիայի նախագահ Ֆրանսուա Օլանդի հետ, հաղորդել է ՌԻԱ Նովոստին: