Վրաստանը երեք պայման է դնում ՌԴ-ի հետ դիվանագիտական հարաբերությունները վերականգնելու համար

Վրաստանի արտաքին գործերի նախարար Մայա Փանջիկիձեն նշել է այն երեք պայմանները, որոնք Ռուսաստանը պետք է կատարի երկու երկրների միջև դիվանագիտական հարաբերությունները վերականգնելու համար, տեղեկացնում է «Նովոստի Գրուզիա»-ն:

«Դրանք են երկրի ապաօկուպացումը, հրաժարումը (Աբխազիայի և Հարավային Օսիայի) անկախության ճանաչումից և հրադադարի վերաբերյալ 2008 թվականի օգոստոսի 12-ի համաձայնագրի կատարումը»,-ասել է Փանջիկիձեն հունիսի 20-ին Թբիլիսիում լրագրողների հետ կայացած հանդիպմանը:

Հունիսի 19-ին ՌԴ արտաքին գործերի փոխնախարար Գրիգորի Կարասինը հայտարարել էր, թե «Ռուսաստանը որոշում չի ընդունել 2008 թվականի օգոստոսին դրանց (դիվանագիտական հարաբերությունների) խզման մասին, ուստի Ռուսաստանը չէ, որ պետք է մտածի դրանց վերականգման պաշտոնական կողմի մասին»: Դրա հետ մեկտեղ նա նշել է, որ պետք է ամեն ինչ անել՝ «վերականգնելու այն բարի ավանդույթները, որոնք մշտապես եղել են Վրաստանի և Ռուսաստանի ժողովուրդների միջև»:

Ինչպես հայտարարել է Փանջիկիձեն, Ռուսաստանի հետ երկխոսության ոչ մի ձևաչափով, ներառյալ Ժնևյան բանակցությունները և երկու երկրների հատուկ ներկայացուցիչների հանդիպումները, դիվանագիտական հարաբերությունների վերականգնման հարց չի քննարկվել:

Ժնևի բանակցությունները 2008 թվականի հոկտեմբերից անցկացվում են այն պայմանավորվածությունների հիման վրա, որոնք Վրաստանում 2008 թվականի օգոստոսյան պատերազմից հետո ձեռք են բերվել ԵՄ-ի, ՄԱԿ-ի և Եվրոպայի անվտանգության և համագործակցության կազմակերպության (ԵԱՀԿ) միջնորդությամբ: Ժնևի հանդիպումներին մասնակցում են Վրաստանի, Ռուսաստանի, ԱՄՆ-ի պատվիրակությունները, աբխազական և հարավօսական կողմերի ներկայացուցիչները: