Հիլարի Քլինթոնը լռության է մատնում առողջության հետ կապված խնդիրները

2016 թվականի ընտրություններում Դեմոկրատական կուսակցությունից նախագահի հավանական թեկնածու Հիլարի Քլինթոնը, հավանաբար, միտումնավոր թաքցնում է իր առողջական վիճակին վերաբերող տեղեկատվությունը:

«Նա գտել է իր բժշկական պատմությունը գաղտնի պահելու միջոցը` երկյուղ կրելով, որ կզրկվի նախագահ դառնալու շանսերից, եթե նման տվյալները հրապարակվեն»,- իր «Քլինթոններն ընդդեմ Օբամայի. տոհմական թշնամություն» նոր գրքում նշում է գրող Էդվարդ Քլայնը, որից մի քանի էջ հրապարակել է Drudge Report ռեսուրսը:

«Նրա նկատմամբ անհրաժեշտ է մշտական հսկողություն սահմանել մնացած ամբողջ կյանքի ընթացքում»,- հայտարարել են բժիշկներն ԱՄՆ-ի նախկին նախագահ Բիլ Քլինթոնին այն բանից առաջ, երբ կնոջը դուրս են գրել հիվանդանոցից, որտեղ նա հայտնվել էր սրտի հետ կապված խնդիրների պատճառով՝ Քլայնի գրքից հրապարակված էջերի համաձայն:

Հեղինակը նաև գրում է, որ դրանից առաջ բժիշկները Հիլարի Քլինթոնի օրգանիզմում ոչ միայն մի քանի թրոմբ են հայտնաբերել, այլև պարզել են, որ առկա է դրանց հետագա առաջացման հակվածություն:

Քլայնը նկարագրում է մի շարք դեպքեր, երբ նախկին պետքարտուղարն ուշաթափվել է. օրինակ՝ Պետդեպարտամենտի շենքում և Եմեն մեկնելուց առաջ իքնաթիռ նստելիս:

Ամերիկացի գրող Էդվարդ Քլայնը, որն ավելի վաղ միջազգային գործերի գծով խմբագիր է աշխատել Newsweek հրատարակությունում, հայտնի է Քենեդիների գերդաստանի, Բարաք Օբամայի մասին պատմող իր գրքերով, ինչպես նաև Հիլարի Քլինթոնի մասին վեպով, որը հրատարակվել է 2005 թվականին, հաղորդել է ՌԻԱ Նովոստին: