«Ուկրաինական ճգնաժամը կնորացնի Եվրոպայի անվտանգության ըմբռնումը». Բուրկհալտեր

Ուկրաինական ճգնաժամը պետք է ԵԱՀԿի երկրներին դրդի կատարելագործելու Եվրոպայի անվտանգության համակարգը: Այդ մասին հունիսի 24-ին հայտարարել է Եվրակազմակերպության գործող նախագահ, Շվեյցարիայի արտաքին գործերի նախարար և նախագահ Դիդիե Բուրկհալտերը:

«Ուկրաինական ճգնաժամը պետք է արթնացնի մեզ: Մենք չպետք է վերադառնանք դեպի անցյալ տարիների քարացած հնամոլությանը: Եթե մենք անվտանգությունը կառուցենք միմյանց հաշվին կամ նույնիսկ միմյանց դեմ, մենք ամեն ինչ կկորցնենք և կհայտնվենք ավելի վտանգավոր իրադրության մեջ»,- ասել է Բուրկհալտերը՝ ելույթ ունենալով ԵԱՀԿ-ի Անվտանգության ամենամյա ամփոփիչ խորհրդաժողովում:

Նրա խոսքով՝ Եվրոպայի անվտանգության իրադրությունը պետք է քննարկվի միջազգային նորմատիվ բազայի, անվտանգության ճարտարապետության մակարդակում և իրենց անվտանգության վերաբերյալ պետությունների տեսակետների մակարդակում:

«Սպառնալիքների ընդհանուր ըմբռնման քննարկումը և մշակումը կարևոր ավանդ է նորովի Եվրոպայի անվտանգության՝ որպես մեր ընդհանուր ծրագրի կոնսոլիդացման բնագավառում»,- հայտարարել է Բուրկհալտերը: «Ինչպիսին էլ որ լինեն մեր տարբերություններն Ուկրաինայի և Եվրոպայի անվտանգության մյուս կարևոր թեմաների շուրջը, մնում են զգալի թվով ընդհանուր շահեր, որոնց վրա մենք կարող ենք հիմնվել: Կան շատ սպառնալիքներ և շատ մարտահրավերներ, որոնք մեր հանդեպ ծառանում են ինչպես եվրատլանտյան, այնպես էլ եվրասիական տարածաշրջանում»,- հավելել է նա, հաղորդել է ՌԻԱ Նովոստի գործակալությունը: