ԵԽԽՎ-ում Ալիևի ելույթն ընթացել է բողոքի ակցիաներով դահլիճում և դրսում (լուսանկարներ)

Եվրոպայի Խորհրդի խորհրդարանական վեհաժողովում Ադրբեջանի նախագահ Իլհամ Ալիևի ելույթն ընթացել է բողոքի ակցիայով, որն անցկացրել են եվրոպաբնակ ադրբեջանցիները:

Ինչպես հաղորդում է «Ազադլըգ» թերթը, ԵԽԽՎ-ում Ալիևի ելույթն սկսվելուց անմիջապես հետո Եվրոպայում բնակվող ադրբեջանցիները «Ազատություն քաղբանտարկյալներին» բովանդակությամբ երկար պաստառ են պարզել: Նրանց հագին եղել են Ադրբեջանում քաղբանտարկյալների դիմանկարներով կարմիր շապիկներ:

Ալիևի ելույթին զուգահեռ դահլիճում քաղբանտարկյալների դիմանկարներով շապիկներով և բերանները սև շորով փակ եվրոպաբնակ ադրբեջանցիները բողոքի ակցիա են անցկացրել:

Թերթը գրում է, որ այս տեղեկությունը Facebook-ի իրենց էջերում տարածել են Ստրասբուրգում քաղաքացիական հասարակության ակտիվիստները:

Ակցիան կազմակերպել է խոսքի ազատության «Լրագրողներն առանց սահմանների» միջազգային կազմակերպությունը: Այս մասին «Ազադլըգին» հայտնել է Ստրասբուրգում գտնվող սեփական աղբյուրը:

Աղբյուրի խոսքով' կազմակերպությունը դրանով ցանկանում է ուշադրության հրավիրել Ադրբեջանում մարդու իրավունքների, այդ թվում' խոսքի և մամուլի ազատության բնագավառում ծանր վիճակը: