Իրաքում 17 օրվա բախումների հետևանքով ավելի քան հազար քաղաքացի է զոհվել

Իրաքում «Իրաքի և Լևանտի իսլամական պետություն» խմբավորման հետ 17 օրվա բախումների հետևանքով զոհվել է ավելի քան հազար խաղաղ բնակիչ: Ինչպես հաղորդում է «Արմենպրես»-ը, վկայակոչելով ռուսական ԻՏԱՌ-ՏԱՍՍ գործակալությունը, այս մասին հունիսի 24-ին հայտարարել է ՄԱԿ-ի մարդու իրավունքների բարձրագույն հանձնակատարի մամուլի քարտուղար Ռուպերտ Կոլվիլը: Նրա խոսքով` խաղաղ բնակիչների մեծամասնություը սպանվել է Իրաքի հյուսիսում, որտեղ հսկողություն են հաստատել ծայրահեղականները: «Նինվե և Սալահ ադ Դին նահանգներում հունիսի 5-ից 22-ն ընկած ժամանակահատվածում սպանվել է 757 մարդ և վիրավորվել 599-ը»,- նշել է նա՝ ավելացնելով, որ նշված ժամանակահատվածում ևս 318 մարդ սպանվել և 590 վիրավորվել է Բաղդադում և հարավային շրջաններում` ականապատ նվազագույնը 6 մեքենաների պայթյունների հետևանքով: Կոլվիլը նաև նշել է, որ ԻԼԻՊ-ը բազմաթիվ տեսանյութեր է տեղադրել համացանցում, որտեղ ցուցադրվում են զենքերը վայր դրած զինվորների կամ ոստիկանների նկատմամբ դաժան վերաբերմունքը: Ամենայն հավանականությամբ, նման վերաբերունքի պատճառը նրանց կրոնական հայացքներն են կամ էթնիկ պատկանելությունը, այդ թվում` շիա կամ փոքրամասնություն լինելը: «Իրաքի և Լևանտի իսլամական պետություն» կոչվող խմբավորումը հունիսի 10-ից լայնածավալ գործողություններ էր սկսել Իրաքի հյուսիսում: Նրանք ամբողջովին գրավել են Նինվե նահանգի Մոսուլ քաղաքը: Իրաքյան ուժերն իրենց հերթին հայտարարել են, որ լայանծավալ ռազմական գործողություններ են սկսում Մոսուլում և Թիրքիթում գտնվող ԻԼԻՊ խմբավորման անդամների դեմ: Իրաքը օգնության խնդրանքով դիմել էր ԱՄՆ-ին: Վերջինս հայտարարել էր, որ նախքան ռազմական օգնություն ցուցաբերելը անհրաժեշտ է լրացուցիչ տեղեկություններ իմանալ Իրաքի իրավիճակի մասին: Հայտարարությունից հետո ԱՄՆ-ը ընդլայնել է Իրաքի տարածքում օդային հետախական թռիչքների քանակը: