Բիլ Քլինթոնը խոստովանել է, որ իր նախագահության ավարտին բազմամիլիոնանոց պարտքեր է կուտակել

ԱՄՆ-ի նախկին նախագահ Բիլ Քլինթոնը հավաստել է, որ այն պահին, երբ ինքը 2001 թվականի հունվարին հեռացել է նախագահի պաշտոնից, իր ընտանիքը վիթխարի պարտքեր է ունեցել:

«Մենք իրոք ունեցել ենք մի քանի միլիոն դոլարի պարտք»,- հայտարարել է Քլինթոնը Միացյալ Նահանգների NBC հեռուստաընկերությանը տված հարցազրույցի ժամանակ, որից հատվածներ են ցուցադրվել եթերում:

Երկու շաբաթ առաջ Հիլարի Քլինթոնն ABC հեռուստաալիքին պատմել է, որ, հեռանալով Սպիտակ տնից՝ ինքն ու ամուսինը եղել են ոչ միայն անհաջողության, այլև պատքերի մեջ: Այս արտահայտությամբ նա հարուցել է ամերիկյան մամուլի քննադատության տարափը: Լրագրողները պնդում էին, որ նախկին նախագահի ֆինանսական դժվարությունները համեմատելի չեն այն խնդիրների հետ, որոնց բախվում են միլիոնավոր շարքային ամերիկացիներ:

Բիլ Քլինթոնը ժխտել է այն պնդումները, թե իր կինը «կտրված է իրականությունից» և չգիտե, թե իրականում ինչ է աղքատ լինելը: Նախկին նախագահի խոսքով՝ իր կինն ամբողջ կյանքում պայքարել է միջոցների պակասության դեմ, այդ թվում՝ Նյու Յորքի նահանգից սենատորի պաշտոնում եղած ժամանակ:

Հիլարի Քլինթոնի յուրաքանչյուր արտահայտություն գրավում է հասարակայնության և մամուլի համակ ուշադրությունը, քանի որ նա համարվում է Դեմոկրատական կուսակցությունից 2016 թվականի նախագահական ընտրություններում առավել հավանական թեկնածուներից մեկը: Մինչդեռ, նախկին պետքարտուղարն ինքը պնդում է, թե առայժմ չի որոշել՝ կմասնակցի արդյոք Սպիտակ տան համար պայքարին:

Ինչպես նշում են զանգվածային լրատվամիջոցները, նախագահի պաշտոնից հեռանալուց հետո Բիլ Քլինթոնն սկսել է հանդես գալ վճարովի դասախոսություններով: Այդ ժամանակվանից ի վեր, ըստ մամուլի տվյալների՝ նա վաստակել է շուրջ 106 միլիոն դոլար: Նախագահի պաշտոնում Քլինթոնի աշխատավարձը կազմել է տարեկան 200 հազար դոլար:

2013 թվականի սկզբին հեռանալով պետքարտուղարի պաշտոնից՝ Հիլարի Քլինթոնը նույնպես սկսել է դասախոսություններ կարդալ: Ըստ ԶԼՄ-ների տվյալների՝ մեկ հրապարակային ելույթի համար նրա միջին հոնորարը կազմում է 200 հազար դոլար: Համեմատության համար նշենք, որ Միացյալ Նահագների արտաքին քաղաքական գերատեսչության ղեկավարի պաշտոնում նա ստանում էր տարեկան 186 հազար դոլար: Նաև հայտնի է, որ Քլինթոններն ունեն երկու տուն՝ Վաշինգտոնում և Չապակուայում (Նյու Յորքի նահանգ), հաղորդել է ԻՏԱՌ-ՏԱՍՍ-ը: