Հովհաննես Մարգարյանն առաջարկում է վերանայել տեսանկարահանող և արագաչափ սարքերի աշխարհագրությունը

Ազգային ժողովի ՕԵԿ խմբակցության պատգամավոր Հովհաննես Մարգարյանը դրական է գնահատում ճանապարհային երթևեկության կանոնների խախտման համար սահմանված տուգանքների նվազեցման մասին կառավարության նախաձեռնությունը, սակայն գտնում է, որ այս հարցում դեռևս անելիքներ կան: «Իհարկե, կարելի է քայլ առաջ համարել այն, որ օրերս Ազգային ժողովը վավերացրեց այն նախագիծը, որով էականորեն նվազեցվում են առավել նվազ վտանգավորության խախտումների համար տուգանքները, սակայն սա մեր հանրությանը հուզող հարցերից մեկն է, և մենք հետևողական ենք լինելու, որպեսզի հետագայում ևս այս հարցում նոր բարեփոխումներ լինեն»,- նշեց պատգամավորը՝ հիշեցնելով, որ ՕԵԿ-ը ևս ուներ շրջանառության մեջ դրված նախագիծ, որով առաջարկվում էր փոքրացնել առավել նվազ վտանգավորության խախտումների համար սահմանված տուգանքների չափը:

Պատգամավորի խոսքով՝ առաջիկայում պետք է լրջորեն ուսումնասիրվի արագաչափ սարքերի և տեսախցիկների աշխարհագրությունը: Նա ընդգծեց, որ Հայաստանում դրանք չափազանց շատ են, և պետք է դիտարկվի դրանց թիվը նվազեցնելու և առավել կարևոր վայրերում տեղադրելու հարցը: «Օրինակ, ես վերջերս, երբ մասնակցում էի Եվրոպայի ժողովրդական կուսակցության համաժողովին, եղա մի շարք եվրոպական երկրներում, և պետք է ասեմ, որ, օրինակ, Բրյուսելում ես շատ քիչ եմ հանդիպել արագաչափ սարքերի և տեսախցիկների: Այս հարցն իսկապես շատ կարևոր է, և այն պետք է քննարկման առարկա դարձնել: Մենք կարծում ենք, որ իմաստ չունի ամեն մի կիլոմետրի վրա արագաչափ դնել»,- նկատեց պատգամավորը:

Նա ընդգծեց, որ հարկավոր է հասնել այն բանին, որ ճանապարհային երթևեկության խախտումների համար տուգանքները համադրելի լինեն ՀՀ քաղաքացու նվազագույն աշխատավարձի, կենսաթոշակների, միջին եկամտի հետ:

Ազգային ժողովն ամբողջությամբ ընդունել է կառավարության ներկայացրած «Վարչական իրավախախտումների մասին» ՀՀ օրենքում փոփոխություններ և լրացումներ կատարելու մասին օրենքի նախագիծը, որով էականորեն փոքրացվել են ճանապարհային երթևեկության առավել նվազ վտանգավորություն ներկայացնող տուգանքների չափերը: Միևնույն ժամանակ, զգալիորեն բարձրացել են վտանգավոր խախտումների համար տուգանքները: