Աբխազիայի նախկին փոխվարչապետն առաջադրվել է նախագահի թեկնածու

Նախաձեռնող խումբն Աբխազիայի նախկին առաջին փոխվարչապետ Բեսլան Էշբին առաջադրել է հանրապետության նախագահի թեկնածու:

Հունիսի 25-ին Կենտրոնական ընտրական հանձնաժողովը գրանցել էր առաջին նախաձեռնող խմբին, որը հանրապետության նախագահի թեկնածու է առաջադրել պաշտպանության նախարարի պաշտոնակատար Միրաբ Կիշմարիային:

Աբխազիայում մեկնարկել է նախագահի թեկնածուների առաջադրող կուսակցությունների և նախաձեռնող խմբերի գրանցման, ինչպես նաև պետության բարձրագույն պաշտոնի հավակնորդների առաջադրման գործընթացը: Այն կշարունակվի մինչև հուլիսի 14-ը: Աբխազիայում վաղաժամկետ նախագահական ընտրությունները տեղի կունենան օգոստոսի 24-ին՝ կապված ընդդիմության պահանջով հունիսի 1-ին նախագահ Ալեքսանդր Անկվաբի պաշտոնաթողության հետ:

Նախագահի թեկնածու առաջադրելու իրավունք ունեն նախաձեռնող խմբերը և այն վեց կուսակցությունները, որոնք հանրապետության արդարադատության նախարարությունում գրանցված են ընտրությունների նշանակված ամսաթվից հինգ ամիս առաջ: Դրանք են՝ Աբխազիայի տնտեսական զարգացման կուսակցությունը, «Աբխազիայի ժողովրդական միասնության ֆորումը», Աբխազիայի ժողովրդական կուսակցությունը, Աբխազիայի կոմունիստական կուսակցությունը, «Ամցախարան» և «Միասնական Աբխազիան»:

Աբխազիայի սահմանադրության համաձայն՝ հանրապետության նախագահ է ընտրվում երկրի` ազգությամբ աբխազ քաղաքացին, որն ունի 35-ից բարձր և 65-ից ցածր տարիք, օգտվում է ընտրական իրավունքից և տիրապետում է աբխազերենին, հաղորդել է ԻՏԱՌ-ՏԱՍՍ-ը: