Պուտինը Մերկելի հետ քննարկել է ուկրաինական ճգնաժամը

Ռուսաստանի նախագահ Վլադիմիր Պուտինը Գերմանիայի կանցլեր Անգելա Մերկելի հետ քննարկել է Ուկրաինայում ստեղծված իրադրությունը: Հեռախոսազրույցը կայացել է գերմանական կողմի նախաձեռնությամբ:

«Ղեկավարները շարունակել են կարծիքների փոխանակումը Ուկրաինայում ստեղծված սուր ճգնաժամային իրադրության կարգավորմանը միջազգային աջակցություն ցուցաբերելու համատեքստում: Մասնավորապես, արծարծվել են հակամարտող կողմերի միջև հրադադարի ռեժիմի պահպանման վերահսկողության, զինադադարի երկարաձգման անհրաժեշտության, շփման խմբի կանոնավոր աշխատանքի կազմակերպման և բռնությամբ պահվող անձանց ազատելու հարցերը»,-նշել են մամուլի ծառայությունում:

«Պուտինն ուշադրություն է դարձրել սրվող հումանիտար իրադրության և Ռուսաստանի տարածքում ուկրաինացի փախստականների թվի ավելացման վրա»,-ընդգծել են Կրեմլում:

Մինչդեռ Գերմանիայի կանցլերը, նախօրյակին ելույթ ունենալով Բունդեսթագում, հայտարարել էր, որ Ուկրաինայում իրադրության կարգավորման գործընթացը շատ դանդաղ է ընթանում, և եթե իրադրությունը չշտկվի, Ռուսաստանի դեմ սահմանված պատժամիջոցների խստացման հարցը «վերստին կարող է հայտնվել օրակարգում»:

Ավելի վաղ Եվրախորհրդի նախագահ Հերման Վան Ռոմպյոյը հայտնել է, որ Ռուսաստանի նկատմամբ պատժամիջոցների հարցը վերստին կքննարկվի Եվրամիության հունիսի 26-27-ի գագաթնաժողովում:

Մինչ այդ Մեծ Բրիտանիայի վարչապետ Դևիդ Քեմերոնը և ԱՄՆ-ի նախագահ Բարաք Օբաման, սպառնալով նոր պատժամիջոցներով, Ռուսաստանից պահանջել են դադարեցնել զենքի մատակարարումը Ուկրաինայի արևելյան տարածաշրջաններին և ուկրաինացի «անջատականների» պատրաստումը: