Իրաքցի ահաբեկիչների խոստովանությունը. Թուրքիայի իշխող կուսակցությունը մեզ մեծ աջակցություն է ցուցաբերել

«Իրաքի և Լևանտի իսլամական պետություն» (ԻԼԻՊ) ահաբեկչական խմբավորման մարտիկը հանդես է եկել սենսացիոն հայտարարությամբ այն մասին, որ Թուրքիայի վարչապետի գլխավորած' իշխող «Արդարություն և զարգացում» կուսակցության (ԱԶԿ) կառավարությունը մեծ աջակցություն է ցուցաբերել իրենց: Այս մասին ԻԼԻՊ-ի մարտիկը հայտնել է թուրքական «Այդընլըք» թերթի թղթակցի հետ զրույցում:

«Թուրքիան մեզ շատ է աջակցել: Եթե Թուրքիան մեր նկատմամբ ըմբռնողություն չցուցաբերեր, այսօր ԻԼԻՊ-ն այս վիճակում չէր գտնվի: Մեր նկատմամբ հարգանքով վերաբերվեցին, մեր մեծ թվով զինակիցներ բուժվում են Թուրքիայում: Բայց դժվար է ասել, թե ինչ կլինի սրանից հետո»,- ասել է նա:

HaberTurk-ը հայտնում է, որ 3 տարի Սիրիայում կառավարական ուժերի դեմ կռվող «Ալ Քաիդա» միջազգային ահաբեկչական կազմակերպության զինված թև «Ալ Նուսրա ճակատ» խմբավորման մարտիկները հայտարարել են Իրաքում ԻԼԻՊ-ի հետ միավորվելու մասին: ԻԼԻՊ-ի հետ միավորվելու և հավատարիմ մնալու մասին նրանք երդում են տվել Սիրիայի հետ Իրաքի սահմանում գտնվող Ալբու Քամալ քաղաքում: Նրանք ԻԼԻՊ-ի մարտիկների հետ միասն վերահսկում են իրաք-սիրիական Ալ Քաիմ և Բուքամալ սահմանակետերը, որոնք գտնվում են Դեր Զորի տարածաշրջանում:

Նշվում է, որ երկու ահաբեկչական խմբավորումների միավորվելը նոր լարվածություն է ստեղծելու Սիրիայում կռվող այլ խմբավորումների միջև և ավելի է ծանրացնելու իրավիճակը տարածաշրջանում: