ՄԻՊ-ը Գլխավոր դատախազությանն առաջարկում է ուժեղացնել օրինականությունը հանցագործության մասին հաղորդման ընդունման գործում

ՀՀ Մարդու իրավունքների պաշտպանը Գլխավոր դատախազությանն առաջարկում է ուժեղացնել օրինականությունը հանցագործությունների մասին հաղորդումների ընդունման, գրանցման, ընթացք տալու գործում: Այս մասին նշված է ՄԻՊ աշխատակազմի տարածած հաղորդագրության մեջ, որում ասված է.

«Գլխավոր դատախազության անբավարար վերահսկողության արդյունքում խախտվել է մարդու իրավունքը: Այսպես, Երևանի բնակչուհին դիմել էր հետաքննության մարմնին՝ հայտնելով, որ քրոջ դուստրը կեղծիքների միջոցով փորձել է տիրանալ իրենց հայրական տանը: Հետաքննության մարմինը քրեական գործ չէր հարուցել, բայց ոչ էլ մերժել էր գործի հարուցումը, դրանով իսկ քաղաքացին զրկվել է իրավական պաշտպանության արդյունավետ միջոցների իրավունքից: Փաստորեն, Գլխավոր դատախազության թողտվության պայմաններում քաղաքացին զրկվել է իրավական պաշտպանության բոլոր հնարավորություններից:

Մինչդեռ, համաձայն Քրեական դատավարության օրենսգրքի, գլխավոր դատախազությունը բացառիկ լիազորություն ունի ստուգել, թե հետաքննության մարմինն ինչպես է կատարում հանցագործությունների մասին հաղորդումների ընդունման, գրանցման և լուծման մասին օրենքի պահանջները, ստուգման համար հետաքննության մարմնից, քննիչից պահանջել փաստաթղթեր, քրեական գործեր և քննության ընթացքի մասին տեղեկություններ, ծանոթանալ դրանց կամ դրանք ստուգել հետաքննության մարմնի գտնվելու վայրում:

Դատախազությունը, սակայն, անտեսելով Սահմանադրության ու «Դատախազության մասին» օրենքի պահանջները, Պաշտպանի գրությանն ի պատասխան, հայտնել է, որ Երևանի բնակչուհու «դիմումի ստուգումը վերջինիս իրավունքների սահմանափակմանը կամ խախտմանը չի հանգեցրել»: Միևնույն ժամանակ, միայն Պաշտպանի միջամտությունից հետո որոշում է կայացվել մերժել քրեական գործի հարուցումը: Մինչդեռ, եթե Դատախազությունը պատշաճ վերահսկեր հետաքննական և նախաքննական մարմինների գործողությունների օրինականությունը, ապա չէր խախտվի Քրեական դատավարության օրենսգրքով սա հմանված օրինականության սկզբունքը:

Արդյունքում Կարեն Անդրեասյանը կայացրել է մարդու իրավունքների խախտման որոշում:

Օմբուդսմենը Գլխավոր դատախազությանն առաջարկում է ուժեղացնել օրինականությունը հանցագործությունների մասին հաղորդումների ընդունման, գրանցման, ընթացք տալու գործում, ինչպես նաև պատասխանատվության ենթարկել խախտումը կատարած պաշտոնատար անձանց»: