Գեղարքունիքում վերջին 6 ամիսներին արձանագրվել է ապօրինի պահվող զինամթերքի կամավոր հանձնման և հայտնաբերման 257 դեպք

Ոստիկանության Գեղարքունիքի մարզային վարչության և ենթակա ստորաբաժնումների կողմից 2014թ. հունվարի 8-ից մինչև հունիսի 26-ն ընկած ժամանակահատվածում ձեռնարկված միջոցառումների ու բացատրական աշխատանքների շնորհիվ, արձանագրվել է բնակչության մոտ ապօրինի պահվող զենք-զինամթերքի կամավոր հանձնման և հայտնաբերման 257 դեպք: Կամավոր հանձնվել և հայտնաբերվել է 15 ինքնաձիգ, որոնցից 5-ը՝ ինքնաշեն, 2 գնդացիր, 28 ատրճանակ, այդ թվում 2-ը՝ «Մակարով» տեսակի, 23-ը՝ ինքնաշեն, մեկական թմբուկավոր, գազային և ազդանշանային ատրճանակ: Հայտնաբերվել է 166 հրացան, որոնցից 2-ը՝ ինքնաշեն, 53 նռնակ, որից 13-ը՝ ինքնաշեն, 39-ը՝ նռնակի պայթուցիչ, 2 նռնականետ, 3 ական, հրանոթի 1 արկ, տարբեր տրամաչափի 6081 փամփուշտ, ինքնաձիգի 18 պահունակ, ինչպես և զանազան պայթուցիկ նյութեր ու սարքեր, դետոնացիոն քուղ ու դաշույն: