Վրաստանը կարող է Եվրամիության լիիրավ անդամ դառնալ 5-10 տարի հետո. Ղարիբաշվիլի

Վրաստանը դեռ չի հստակեցրել Եվրամիությանն անդամակցության հայտ ներկայացնելու ժամկետի հարցը. երկիրը Եվրամիության լիիրավ անդամ կարող է դառնալ 5-10 տարի հետո: Այդ մասին Բրյուսելում կայացած մամուլի ասուլիսում հայտարարել է Վրաստանի վարչապետ Իրակլի Ղարիբաշվիլին:

Պատասխանելով լրագրողի այն հարցին, թե Վրաստանը երբ կարող է դառնալ ԵՄ-ի լիիրավ անդամ, Ղարիբաշվիլին նշել է, որ «հինգ տարի հետո, գուցեև՝ տասը տարի հետո: Ինչ իմանաս: Դա կախված է առաջընթացից, որը կունենա Վրաստանը: Մենք լիովին տրամադրված ենք իրականացնելու բոլոր բարեփոխումները, որպեսզի համապատասխանենք ԵՄ-ի պահանջներին… ես կարող եմ երաշխավորել, որ հնարավոր ամեն բան կանենք ԵՄ-ի բոլոր պահանջները կատարելու համար»:

Ինչպես արդեն հաղորդվել է, Վրաստանը հունիսի 27-ին ստորագրել է Եվրամիության հետ ասոցացման մասին համաձայնագիրը, որը նախատեսում է այդ երկրի մուտքը ԵՄ-ի ազատ առևտրի գոտի: Վրաստանի կողմից համաձայնագիրն ստորագրել է հանրապետության վարչապետ Իրակլի Ղարիբաշվիլին, Եվրամիության կողմից՝ Եվրահանձնաժողովի նախագահ Ժոզե Մանուել Բառոզուն և Եվրախորհրդի նախագահ Հերման վան Ռոմպեյը:

Ղարիբաշվիլին հայտարարել է, որ Հարավային Օսիան և Աբխազիան կօգտվեն «Եվրամիության հետ ասոցացման համաձայնագրի բոլոր բարիքներից»: Նա, մասնավորապես, Հարավային Օսիայի և Աբխազիայի բնակիչներին խոստացել է «եվրոպական շուկայի, այցագրային ռեժիմի, եվրոպական կրթության բոլոր բարիքները»: Մինչդեռ Եվրահանձնաժողովն ավելի վաղ հայտնել է, որ ԵՄ-ի հետ ազատ առևտրի կանոնները չեն տարածվելու Հարավային Օսիայի և Աբխազիայի արտադրանքի վրա:

Վրաստանը «հաստատ ցանկություն ունի դառնալու եվրոպական ընտանիքի լիիրավ անդամը», ասել է Ղարիբաշվիլին: «Ես հավատում եմ, որ շուտով Վրաստանը կդառնա Եվրամիության լիիրավ անդամ»,- հավելել է նա:

Իր հերթին Եվրահանձնաժողովի նախագահ Ժոզե Մանուել Բառոզուն հայտարարել է, որ Ասոցացման համաձայնագրերը եվրոպական ինտեգրացման եզրափակիչ փուլը չեն լինի Վրաստանի, Մոլդովայի և Ուկրաինայի համար: «Այդ համաձայնագրերն իր գործընկերների հետ ԵՄ-ի կոոպերացման վերջը չեն: Ընդհակառակը, ասոցացման մասին համաձայնագրերի ստորագրումը պետք է ընկալվի ոչ թե որպես ճանապարհի վերջը, այլ ճամփորդության սկիզբ, որը Եվրամիությունն ու երեք գործընկեր երկրները միասին սկսում են այսօր»,- ասել է Բառոզուն, հաղորդել է «Նովոստի Գրուզիան»: