Իտալիայի ափերի մոտ նավում անօրինական ներգաղթյալների 30 դիակ են գտել

Իտալիայի առափնյա պահպանության ծառայությունը ծովում՝ Սիցիլիայի մերձակայքում, շուրջ 30 դիակ է հայտնաբերել ներգաղթյալների
տեղափոխող ձկնորսական նավում, որը մեկնել էր Հյուսիսային Աֆրիկայից: Այս մասին հունիսի 30-ին հաղորդել է Agence France-Presse-ը:

Նախնական տվյալներով՝ ներգաղթյալների մահվան պատճառ է դարձել շնչահեղձությունը: Նավում եղել է 590 գաղթական՝ ներառյալ երկու հղի կին: Իտալացի փրկարարները պարբերաբար գտնում են անօրինական ներգաղթյալների դիակներ, բայց այդ թվաքանակով դիակներ առաջին անգամ է հայտնաբերվել: Ներկայումս նավը վերցվել է քարշակման, ինչպես սպասվում է, շուտով այն կհասցնեն Սիցիլիայի հարավարևելյան ափի Պոցցալո նավահանգիստ: Միայն անցած հանգստյան օրերին Իտալիայի առափնյա պահպանության ծառայությունը փրկել է ավելի քան 1,6 հազար անօրինական գաղթյալների: Տարեսկզբից ի վեր Հյուսիսային Աֆրիկայից գաղթածների ընդհանուր թիվը գերազանցել է 60 հազարը: