Ադրբեջանի զինված ուժերի այս տարվա կորուստները. 47 զոհ, 84 վիրավոր

Ադրբեջանի լրագրողների ռազմական հետազոտությունների «Դոկտրինա» կենտրոնի կողմից զանգվածային լրատվական միջոցներում անցկացրած մոնիտորինգի արդյունքների համաձայն' 2014 թվականի սկզբից մինչ այժմ Ադրբեջանի անվտանգության և պաշտպանության հատվածում կորուստը կազմել է 47 զինծառայող: Այս մասին qafqazinfo.az-ին հայտնել է «Դոկտրինա» կենտրոնի տնօրեն Ջասուր Սումերենլին:

Նրա խոսքով՝ հիշյալ ժամանակաընթացքում ադրբեջանական բանակի 84 զինծառայողներ էլ վիրավորվել և վնասվածքներ են ստացել: Սումերենլին հայտնել է, որ տարվա ընթացքում մահացածներից 34-ը զոհվել են ոչ մարտական պայմաններում, 3-ը զոհվել են ականի պայթյունից, 8-ը' ճանապարհատրանսպորտային պատահարներից, 1-ը' անհայտ պատճառով, 6-ը' ոչ կանոնադրական գործողությունների հետևանքով, 1-ը' դժբախտ դեպքից (ջրում խեղդվելու), 7-ը' հիվանդությունից, 11 հոգի ինքնասպանություն են գործել: Մահացածներից 40-ը պաշտպանության նախարարության, 3-ը' արդարադատության նախարարության, 2-ը' ներքին զորքերի, 2-ը' պետական սահմանային ծառայության զինծառայողներ են:

Վիրավորվածներից կամ վնասվածք ստացածներից 19-ը վիրավորվել են ոչ կանոնադրական, այդ թվում' անզգուշության դեպքերից, 7-ը' ինքնասպանության փորձից, 9-ը' ականի պայթյունից, 2-ը' զինավարժանքների ժամանակ, 33-ը' ճանապարհատրանսպորտային պատահարներից, 2-ը' դժբախտ դեպքից, 11 հոգի' հակառակորդի գնդակից, 1 հոգի թունավորվել է:

Վիրավորվածներից 71-ը ՊՆ, 7-ը' ներքին զորքերի, 5-ը' պետական սահմանային ծառայության, 1-ը' արդարադատության նախարարության քրեակատարողական ծառայության պահպանության գնդի զինծառայողներ են: Նշված ժամանակաշրջանում 1 զինակոչիկ զոհվել է ավտոմեքենայի վթարից:

APA լրատվական գործակալությունը հայտնել է, որ երեկ երեկոյան Ադրբեջանի ՊՆ ադրբեջանա-ղարաբաղյան հակամարտ զորքերի շփման գծում տեղակայված զորամասերից մեկում «վառարանում կրակ վառելու փորձ կատարելու» ժամանակ մարմնի տարբեր մասերի ուժեղ այրվածքներ է ստացել և ծանր վիճակում հոսպիտալացվել է զինվոր Վյուգար Մայիս օղլու Գելեբեգիևը: