Ճապոնիայում կառավարության նախաձեռնությամբ մեկնարկել է էլեկտրաէներգիայի խնայողության արշավը

Կառավարության նախաձեռնությամբ Ճապոնիայում սկսվել է էլեկտրաէներգիայի խնայողության արշավն այն պայմաններում, երբ երկրում առաջին անգամ չի մնացել ոչ մի գործող ատոմային ռեակտոր:

Կառավարությունը և էներգետիկական ընկերություններն արդյունաբերական ձեռնարկություններին և բնակչությանը կոչ են անում էլեկտրաէներգիան խնայել օրվա առավել շոգ ժամանակ՝ հուլիսի 1-ից մինչև սեպտեմբերի 30-ը ժամը 9-ից մինչև 20-ը, երբ մեղմանում է ամռան տապը:

Այս տարվա ամառը կդառնա Ճապոնիայի համար առաջինը, երբ երկրում չի մնացել ոչ մի գործող ատոմային ռեակտոր: Նույնիսկ 2011 թվականի ամռանը՝ «Ֆուկուսիմա-1» ատոմակայանի վթարից հետո, երկրում շարունակում էր աշխատել ավելի քան 10 ռեակտոր: Այն ժամանակ կառավարությունը սահմանել էր էլեկտրականության խնայողության մինչև 10 – 15 տոկոս հանձնարարելի նորմաներ, քանի որ երկրի էներգետիկան, որը մեծապես կողմնորոշված էր դեպի ատոմը, տակավին չէր հասցրել վերակառուցվել հումքի այլ տեսակների համար:

Այժմ, երբ Ճապոնիայի ընկերություններն էներգիայի ավելի քան 85 տոկոսն ստանում են ջերմային էլեկտրակայաններից, ըստ էկոնոմիկայի և արդյունաբերության նախարարության հաշվարկների՝ դրանք կարող են սաստիկ շոգի ժամանակ միջին հաշվով արտադրել անհրաժեշտից 3 – 4 տոկոսով ավելի: Սակայն հզորության այդ պաշարը նվազագույնն է, և այն չի բավականացնի վթարի կամ ցանկացած այլ չնախատեսված իրադրության դեպքում: Դա կառավարությանը հարկադրել է, որ էներգախնայողության արշավ հայտարարի, հաղորդել է ՌԻԱ Նովոստին: