Բաքվում Հեյդար Ալիևի անվան կենտրոնի հայտնի ճարտարապետ Զահա Հադիդը մեղադրվել է ռեպրեսիվ ռեժիմի հետ համագործակցելու մեջ

Բաքվում Հեյդար Ալիեւի անվան կենտրոնի հեղինակ, հայտնի ճարտարապետ Զահա Հադիդը, ում օրերս Լոնդոնի Դիզայնի թանգարանում ճարտարապետության ոլորտում հաջողությունների համար միջազգային մրցանակ էր շնորհվել, մեղադրվել է ռեպրեսիվ ռեժիմի հետ համագործակցելու մեջ:

Ամերիկյան Quartz բիզնես-հրատարակության կայքում հրապարակված Մայքլ Սիլվերբերգի հոդվածում ասվում է, որ միջազգային մրցանակ է տրվել մի կենտրոնի, որը կրում է դիկտատոր Հեյդար Ալիևի անունը:

Հեղինակի խոսքով' Հադիդի հաճախորդը հանդիսանում է Իլհամ Ալիևը՝ Ադրբեջանի նախագահը և նույնպիսի դիկտատոր, ինչպիսին նրա հայրն է: Նրա ռեժիմը հայտնի է կոռուպցիայի բարձր մակարդակով և մարդու իրավունքների խախտումներով: Անցյալ հոկտեմբերին Իլհամ Ալիևը վերընտրվել է երրորդ ժամկետում պաշտոնավարելու համար ձայների անհավանական բարձր՝ 84,6 տոկոսով:

«Հադիդը հայտարարել է, որ այդ նախագիծն իրեն դիզայնի գրեթե բացարձակ ազատության հնարավորություն է տվել: Սակայն, ըստ երևույթին, ազատությունը վերաբերվել է միայն ճարտարապետությանը, քանի որ The Guardian թերթի համաձայն՝ «Բոսնիայից և Սերբիայից միգրանտ-բանվորները հարկադրաբար աշխատել են սարսափելի պայմաններում, ենթարկվել ֆիզիկական և հոգեբանական բռնությունների:Նրանց անձնագրերն առգրավվել էին», -ասվում է հոդվածում:

Սիլվերբերգը նաև ընդգծում է, որ ադրբեջանական կառավարությունը հարկադրաբար վտարել է բնակիչներին և քանդել հարյուրավոր տներ, որպեսզի կենտրոնի համար տարածք ազատի:

Հեղինակը գրում է, որ Human Rights Watch միջազգային իրավապաշտպան կազմակերպությունը նման խախտումներ է գրանցել նաև Բաքվում իրագործված մյուս նախագծերում, այն դեպքում, երբ Ադրբեջանի կառավարությունը տարեկան 6 մլրդ դոլար է ծախսում «հարուստների և հայտնիների համար քաղաքի» վարկ ստեղծելու համար:

Ուշագրավ է, որ Հեյդար Ալիևի անվան կենտրոնի համար Զահա Հադիդին միջազգային մրցանակ շնորհելու փաստը քննադատել է նաև առաջատար միջազգային մամուլը:

Ավստրալիական Gizmodo հանդեսը գրել է, որ մարդու իրավունքները մշտապես ոտնահարող «Ադրբեջանի հարստությունները ծախսվում են նման տիպի շենքերի վրա»:

Անգլիական The Independent-ը թեմայի մասին հոդվածը վերնագրել է «Նախկին ԿԳԲ-ի դիկտատորի պատվին կառուցված շենք...», իսկ The Financial Times-ը' «Ավտորիտար ռեժիմների հետ նման համագործակցությունը լավ օրինակ չէ»: