Եվրամիության պատմության մեջ առաջին անգամ կնշանակվի ներգաղթի հարցերի եվրակոմիսար

Եվրամիության պատմության մեջ առաջին անգամ Եվրահանձնաժողովի նոր կազմում կնշանակվի ներգաղթի հարցերի առանձին եվրակոմիսար, ինչը պայմանավորված է Մերձավոր Արևելքից և Հյուսիսային Աֆրիկայից Եվրամիության հարավային երկրներ գաղթականների աղետալի ներհոսքով: «Ներգաղթի հարցերով եվրակոմիսարի պաշտոնի ստեղծումը պայմանավորված է մեր միգրացիոն քաղաքականության եվրոպական չափման անհրաժեշտությամբ»,-բելգիական լրատվամիջոցներին տված հարցազրույցում հայտարարել է Եվրամիության՝ հունիսի 27-ի գագաթնաժողովում 2014-2019 թվականներին Եվրահանձնաժողովի նոր կազմի ղեկավար նշանակված Լյուքսեմբուրգի նախկին վարչապետ Ժան Կլոդ Յունկերը: Յունկերի թեկնածությունը Եվրախորհրդարանի նստաշրջանի մասնակիցների կողմից վերջնականապես կհաստատվի հուլիսի 16-ին. սեպտեմբերին վերջին ԵՀ-ի նոր ղեկավարը պետք է ներկայացնի Եվրահանձնաժողովի նոր կազմը, որում կընդգրկվի 28 մարդ՝ ԵՄ-ի յուրաքանչյուր երկրից մեկական: Այս տարվա սկզբից ի վեր միայն Իտալիայի միջերկրածովյան կղզիներ՝ «Եվրոպայի հարավային միգրացիոն դարպասներ», նավակներով 65 հազար միգրանտներ են ժամանել հուզումների ճիրաններում հայտնված Հյուսիսային Աֆրիկայի երկրներից: Այս տարի արդեն գերազանցվել է 2011 թվականի միգրացիոն ռեկորդը, երբ «արաբական գարնան» առաջին արյունահեղ բախումներից եւ Լիբիայում ՆԱՏՕ-ի օդային պատերազմից հետո ամբողջ տարվա ընթացքում Իտալիա ժամանեց 63 հազար գաղթական, հաղորդել է ԻՏԱՌ-ՏԱՍՍ-ը: