ԻԼԻՊ խմբավորումն իր շարքերն է ընդգրկում 8 տարեկան երեխաների

«Իրաքի և Լևանտի իսլամական պետություն»՝ ԻԼԻՊ խմբավորումն իր շարքեր երեխաներ է ընդգրկում, ում տարիքը հազիվ հասնում է 8 տարեկանի: Ինչպես հաղորդում է ռուսական ԻՏԱՌ-ՏԱՍՍ գործակալությունը, այս մասին իր ամենամյա զեկույցում նշել է ՄԱԿ-ի գլխավոր քարտուղար Պան Կի Մունը: Զեկույցում նշվել է, որ ԻԼԻՊ-ի կազմում ը նդգրկված երեխաները անցնում են ռազմական պատրաստականություն և ստանում 200 դոլարի չափով գումար:

ՄԱԿ-ի տվյալներով՝ Սիրիայում ռազմական գործողություններ ծավալող շատ խմբավորումներ, այդ թվում` Սիրիայի ազատ բանակի հետ կապ ունեցող խմբավորումները, քրդական ինքնապաշտպանական խմբերը, «Ջաբհա ան Նուրսա», «Ահրար աշ Շամ» և այլ խմբավորումները նույնպես իրենց շարքերում երեխաներ են ընդգրկում:

Պան Կի Մունի խոսքով` Սիրիան այժմ համարվում է երեխաների համար ամենավտանգավոր վայրն աշխարհում: ՄԱԿ-ի տվյալներով` սիրիական հակամարտության ընթացքում 2011թ.-ից ի վեր Սիրիայում զոհվել է ավելի քան 10 հազար երեխա: Զեկույցում նշվում է, որ երեխաներն ավելի հաճախ զոհվել են կառավարական ուժերի և ապստամբների կողմից բնակելի թաղամասերի ռմբակոծման հետևանքով:

Սիրիայում երեք տարուց ավելի շարունակվող բախումների հետևանքով, ՄԱԿ-ի տվյալներով, զոհերի թիվը գերազանցել է 150 հազարը: Բացի այդ` զոհված հայերի թիվը գերազանցել է 100-ը: