Սահմանադրական բարեփոխումներն անհրաժեշտ են հիմա. Գագիկ Հարությունյան

Սահմանադրական բարեփոխումների հայեցակարգի քննարկումներն այսօր անցկացվեցին Գյումրիում: ՍԴ նախագահ Գագիկ Հարությունյանի համոզմամբ՝ Սահմանադրական բարեփոխումներն անհրաժեշտ են հիմա:

Նրա խոսքով՝ ԱՄՆ-ն, որ առաջին երկիրն է, որ ընդունեց Սահմանադրոթյունը, դա արեց այն ժամանակ, երբ երկիրը պատերազմի մեջ էր գտնվում, իհարկե, հետո փոփոխություններ արվեցին, որովհետև մարդը լուսանցքում էր մնացել:

«Փոփոխություններ կատարվեցին, ու մարդը հայտնվեց Սահմանադրության կենտրոնում: Նման կերպ, Հայաստանն էլ 1995 թվականին պատրաստեց ու ընդունեց Սահմանադրությունը, սակայն, որպես առաջին Սահմանադրություն՝ նրա մեջ բավական բացթողումներ կային», ասաց Հարությունյանը՝ հավելելով. «Երբ գնացի կառավարություն, ոչ մի նախարարություն, բանկ, ձևավորված չունեինք, այնպիսի վիճակներ կային, որ պատմեմ, նույնիսկ կարող է թվալ, թե անեկդոտային վիճակներ են: Բայց մենք այդ իրավճակի մեջ էինք և զրոյից պետք է ստեղծեինք: Գիշերն օրենքը գրում էինք, առավոտը քննարկում ու ընդունում, այլ տարբերակ չկար: Սակայն մենք այդ խնդիրը դրեցինք ու սահմանադրականորեն բարեկարգեցինք մեր սոցիալական ու պետական կյանքը»,- ասաց նա:

Հարությունյանը հիշեցրեց, որ Պարտադիր կուտակային կենսաթոշակային համակարգի օրենքի վերաբերյալ իրենք որոշում կայացրին, սակայն օրենքը կրկին սահմանափակվեց: «Մենք Սահմանադրության մակարդակում չենք գրել ու հստակեցրել, թե այդ որ իրավունքներն են, որ նույնիսկ օրենքով չեն կարող սահմանափակվել: Սեփականության իրավունքի վերաբերյալ վերջին՝ Կուտակայինի հարցում տեսաք, շատերը նույնիսկ նեղացվածության պոզա են ընդունում, բայց իրականության մեջ տասն անգամ Սահմանադրական դատարանը որոշում է ընդունել, որ այս իրավունքը սահմանափակվող իրավունք չէ, մենք հերթական անգամ ընդունում ենք օրենք և օրենքով կրկին սահմանափակում ենք այդ իրավունքը»,- շեշտեց նա: