ՄԱԿ-ի Անվտանգության խորհուրդն արտակարգ հանդիպում կանցկացնի Ուկրաինայում տեղի ունեցած ավիաաղետի կապակցությամբ

ՄԱԿ-ի Անվտանգության խորհուրդը հուլիսի 18-ին Նյու Յորքի ժամանակով ժամը 10:00-ին (Երևանի ժամանակով՝ ժամը 18:00-ին) արտակարգ հանդիպում կանցկացնի Ուկրաինայի իրադրության շուրջ: Այդ մասին, ինչպես տեղեկացնում է «Արմենպրես»-ը, ԻՏԱՌ-ՏԱՍՍ-ին հայտնել են Մեծ Բրիտանիայի մշտական ներկայացուցչությունում, որը պահանջել է ԱԽ-ի նիստ գումարել:

«Մենք ստացել ենք այն բանի հաստատումը, որ հանդիպումը կկայանա հուլիսի 18-ին՝ առավոտյան ժամը 10-ին, և կլինի բաց»,- ասել է մշտական ներկայացուցչության մամուլի կցորդ Դայանա Սանտանան: Նրա խոսքով՝ սպասվում է, որ Ուկրաինայի իրադրության վերաբերյալ հաշվետվությամբ հանդես կգա ՄԱԿ-ի գլխավոր քարտուղարի քաղաքական հարցերով տեղակալ Ջեֆրի Ֆելթմանը:

Ենթադրվում է, որ նիստում քննարկման գլխավոր թեման կլինի հուլիսի 17-ին Ուկրաինայում «Մալայզիայի ավիաուղիներ» ընկերության ինքնաթիռի կործանումը:

Ուկրաինայի իշխանությունները և երկրի արևելքում գործող աշխարհազորայինները ժխտում են իրենց մասնակցությունն ինքնաթիռի կործանմանը:

Ռուսաստանի նախագահ Վլադիմիր Պուտինը հայտարարել է, որ միջադեպի համար պատասխանատվություն է կրում Ուկրաինան, քանի որ այն տեղի է ունեցել նրա տարածքում: «Այդ ողբերգությունը տեղի չէր ունենա, եթե ուկրաինական հողում խաղաղություն լիներ, չվերսկսվեին մարտական գործողություններն Ուկրաինայի հարավ-արևելքում»,- ասել է պետության ղեկավարը:

Իր հերթին ՄԱԿ-ի գլխավոր քարտուղար Պան Գի Մունը հանդես է եկել ավիաաղետի միջազգային փորձաքննություն անցկացնելու օգտին: Կազմակերպության վարչական ղեկավարը հայտնել է, որ ուշադիր հետևում է իրադրության զարգացմանը, ինչպես նաև ցավակցություն է հայտնել զոհվածների ընտանիքներին:

Ինքնաթիռը տեղական ժամանակով ժամը 18:00-ին ընկել է Ուկրաինայի Դոնեցկի մարզի Սնեժնոյե բնակավայրի մերձակայքում:

Ավիափոխադրողի ճշտված տվյալների համաձայն՝ աղետի հետևանքով զոհվել են օդանավում գտնվող բոլոր 283 ուղևորները և անձնակազմի 15 անդամները: Ինքնաթիռում եղել է Նիդեռլանդների 154 քաղաքացի, 27 ավստրալացի, 23 մալայզիացի, 11 ինդոնեզացի, 6 բրիտանացիներ, չորսական քաղաքացիներ Գերմանիայից և Բելգիայից, երեք ֆիլիպինցիներ և մեկ կանադացի: Մնացածների քաղաքացիական պատկանելությունը հայտնի չէ: