Իրանի ԱԳ նախարարը հիմնավորված է համարում «վեցյակի» հետ բանակցությունների երկարաձգումը

Թեհրանի և «վեցյակի» միջև բանակցությունների երկարաձգումը, որոնց նպատակն է Իրանի միջուկային ծրագրի շուրջն ամփոփիչ համաձայնագրի մշակումը, հիմնավորված է: Ինչպես տեղեկացնում է «Արմենպրես»-ը, CCN-ին տված հարցազրույցի ժամանակ այդ կարծիքն է հայտնել Իրանի Իսլամական Հանրապետության (ԻԻՀ) արտաքին գործերի նախարար Ջավադ Զարիֆը:

«Ես կարծում եմ, որ մենք անցկացրել են բավականին լուրջ բանավեճեր և գտնում ենք, որ բանակցային գործընթացի երկարաձգումը հիմնավորված է»,- հայտարարել է Զարիֆը:- Պատմական հնարավորություն է ստեղծվել ավարտելու բանակցությունների ձգձգված փուլը, երբ կողմերից ոչ մեկը չէր ցանկանում լուծել խնդիրները»:

Իրանի նախարարի խոսքով՝ ինքը և ԱՄՆ-ի պետքարտուղար Ջոն Քերին արդեն իրենց պետությունների ղեկավարներին խորհուրդ են տվել համաձայնել բանակցությունների երկարաձգմանը: Զարիֆը նշել է, որ մինչ կողմերը կպայմանավորվեն ԻԻՀ-ի միջուկային ծրագրի համապարփակ համաձայնագրի շուրջ, բանակցային գործընթացի բոլոր մասնակիցները պետք է հաղթահարեն շատ տարաձայնություններ:

«Նրանք առայժմ չեն ներկայացրել այն միջոցառումների փաթեթը, որն ընդունելի լինի մեզ համար: Նրանք պետք է ավելի լրջորեն մոտենան այն հարցերի լուծմանը, որոնք վերաբերում են մեր շահերին»,- հայտարարել է Զարիֆը: Սակայն, նրա խոսքով՝ բանակցային գործընթացի մասնակիցներին հաջողվել է շարժվել մեռյալ կետից: