Լևոն Հայրապետյանի փաստաբանը բողոքարկել է դատարանի մեղադրանքը

Հայազգի գործարար և բարերար Լևոն Հայրապետյանի փաստաբանը բողոքարկել է մեղադրանքը, և այժմ պաշտպանվող կողմը սպասում է դատարանի որոշմանը: Լևոն Հայրապետյանն էլ քննիչի հետ զրույցում չի ընդունել այն մեղադրանքները, որ վերագրել են իրեն: «Արմենպրես»-ի հետ զրույցում այդ մասին նշեց Լևոն Հայրապետյանի ընկեր և վստահված անձ Մացակ Փոլադյանը:

Նրա խոսքով, թե բողոքարկման հարցով դատարանի որոշումը երբ կլինի' պարզ չէ. Ռուսաստանում չկա հստակ ժամկետ, թե բողոքարկման պատասխանը երբ կարող են տալ: «Ասում են' կարող է մեկ շաբաթից կամ տասն օրից: Հստակ ժամկետ չկա, ի տարբերություն Ֆրանսիայի, որտեղ 48 ժամվա ընթացքում են տալիս: Մենք չենք ընդունում և Լևոն Հայրապետյանն էլ չի ընդունում իր մեղքը: Սա սարքած գործ է, հաշվեհարդար և Հայրապետյանը մեղադրանքների հետ ոչ մի առնչություն չունի»,- ընդգծեց Փոլադյանը:

Նրա գնահատմամբ' պատմությունը շատ խառն է, խճճված և ոչ մի խոսք չի համապատասխանում իրականությանը: «Ռուսական լրատվամիջոցները գրում են, որ նրան ձերբակալել են Մոնակոյից վերադառնալուց, մինչդեռ Լևոնը Երևանից է վերադարձել Մոսկվա: Եթե Ռուսաստանի իրավապահ մարմիններն, իրոք, փնտրում էին Լևոնին, ապա ինչո՞ւ նրան չեն ձերբակալել, երբ դեպքից 2 շաբաթ առաջ նա Մոսկվայից մեկնել էր Նիցցա' ինձ մոտ: Եթե սա հաշվեհարդար չէ և Լևոն Հայրապետյանն, իրոք, օրենք էր խախտել, երկրից դուրս գալուց պետք է ձերբակալեին, այլ ոչ թե ներս մտնելուց: Սովորաբար, այդպես են անում»,- նկատեց Մացակ Փոլադյանը' հավելելով, որ ձերբակալությունից հետո խոսել է Հայրապետյանի ռուս ընկերների հետ. նրանք նույնպես համակարծիք են, որ կատարվածը սովորական հաշվեհարդար է:

«Նրա ընկերների մեջ կան իրավապահ համակարգի ներկայացուցիչներ և նրանք բոլորն էլ միաբերան պնդում են, որ Լևոնի «գլխին սարքել» են»,- ասաց Փոլադյանը' հավելելով, որ Հայրապետյանը երբեք չի խոսել, որ Մոսկվայում խնդիրներ ունի և որ իրեն կարող են ձերբակալել: «Թե ում էր ձեռնտու Հայրապետյանի ձերբակալությունը» Փոլադյանը տեղյակ չէ: «Լևոնը միշտ ասում էր, որ թշնամիներ չունի և իր ամբողջ կյանքի ընթացքում մարդկանց օգնել է»,- ասաց Փոլադյանը: Անդրադառնալով Լևոն Հայրապետյանի առողջական վիճակին՝ Փոլադյանն ասաց, որ երկու ամիս առաջ Լոս Անջելեսում լյարդի վիրահատություն է տարել: Բացի այդ, Հայրապետյանը տառապում է շաքարային դիաբետով, ունի ճնշման տատանում, ինչի հետևանքով վերջին շրջանում վատացել է նաև նրա տեսողությունը:

«Երբ ես Նրան Փարիզից ճանապարհ էի դնում Երևան, օդանավակայանում իրեն արդեն շատ վատ էր զգում: Ես նրան առաջարկեցի, որ չմեկնի, բայց ասաց' ոչ, գնամ տեսնեմ Ստեփանակերտում ինչ կա»,- ասաց Փոլադյանը' հավելելով, որ Հայրապետյանը Ստեփանակերտ էր գալիս տեղի ռազմական ակադեմիայի շինարարության ընթացքին հետևելու համար: