Թուրքիայում հակաիսրայելական ցույցեր են սկսվել

Թուրքիայի բազմաթիվ քաղաքներում այսօր հակաիսրայելական զանգվածային ցույցեր են սկսվել Իսրայելի կողմից Գազայի հատվածի վրա հարձակման և Պաղեստինում ցամաքային ռազմական գործողություններ իրագործելու դեմ:

Ինչպես հաղորդում է «Արմենպրես»-ը, վկայակոչելով թուրքական «Հուրիեթ» թերթը, ցուցարարների խումբը հավաքվել է Ստամբուլի Լևենթ թաղամասում գտնվող Իսրայելի գլխավոր հյուպատոսության շենքի առջև: Նրանք պաղեստինյան դրոշներ են ճոճել և բացականչել. «Ողջո~ւյն Ստամբուլից՝ Գազայի դիմադրությանը», «Մարդասպան Իսրայել, հեռացի՛ր Պաղեստինից», «ՀԱՄԱ, հարվածի՛ր Իսրայելին»: Ոստիկանությունը չի միջամտել մինչև այնքան ժամանակ, երբ ցուցարարները ջարդել են գլխավոր հյուպատոսության դռները և փորձել ներխուժել շենք: Ոստիկանությունն արցունքաբեր գազ և ջրաշիթեր է կիրառել, ինչից հետո ամբոխը նահանջել է:

Անկարայում մոտ հազար ցուցարարներ հավաքվել են Իսրայելի դեսպանի նստավայրի առաջ: Նրանք քարեր են նետել շենքի վրա և այգու պատի վրա կախել Պաղեստինի դրոշը: Շենքը շրջապատել և ցուցարարների հնարավոր հարձակումից պաշտպանել են ոստիկանները:

Ադանայում ԱՄՆ-ի գլխավոր հյուպատոսության շենքի առաջ հավաքված ցուցարարները հանդես են եկել մամուլի համար հայտարարությամբ: Ակցիայի մասնակիցները Ղուրան են կարդացել, նամազ արել, որից հետո սկսել են հակաիսրայելական լոզունգներ հնչեցնել:

Իզմիրում 25 մարդուց բաղկացած խումբը քաղաքի կենտրոնական հրապարակում աղոթքներ է կարդացել զոհված պաղեստինցիների համար, հետո լոզունգներ հնչեցրել ի պաշտպանություն Գազայի հատվածի բնակիչների: