Ուկրաինայի Դոնեցկի մարզում մալայզիական հանրանավի կործանման վայրում հայտնաբերվել է 181 զոհվածի մարմին

Աշխարհ 18 Հուլիս, 2014 15:40

Ուկրաինայի Դոնեցկի մարզում մալայզիական հանրանավի կործանման վայրում հայտնաբերվել է 181 զոհվածի մարմին: Այդ մասին, ինչպես տեղեկացնում է «Արմենպրես»-ը, հայտարարել է Ուկրաինայի արտաքին գործերի նախարարությունը:

«Այսօրվա դրությամբ գտնվել է 181 մարմին»,- հուլիսի 18-ին կայացած ճեպազրույցի ժամանակ հայտնել է Ուկրաինայի ԱԳ նախարարության հյուպատոսական ծառայության դեպարտամենտի տնօրեն Անդրեյ Սիբիգան, հաղորդել է «Ինտերֆաքսը»:

Ինչպես նշում է ԻՏԱՌ-ՏԱՍՍ-ը, Ուկրաինան պատասխանատվություն է կրում մալայզիական ինքնաթիռի կործանման հետաքննության համար, սակայն նա կարող է հրաժարվել դրա անցկացումից՝ այն հանձնելով ուրիշ երկրի կամ պրոֆիլային կազմակերպության:

Ավիացիոն իրադարձությունների և քաղաքացիական օդանավերի հետ կապված միջադեպերի հետաքննության ազգային բյուրոն աղետը հետաքննելու համար հրավիրել է «Մալայզիայի ավիաուղիներ» ավիաընկերությանը, միջազգային ավիացիոն կազմակերպությունների` Քաղաքացիական ավիացիայի եվրոպական խորհրդաժողովին, Եվրահսկողությանը, Եվրահանձնաժողովին և Մալայզիայի ու Նիդերլանդների ավիացիոն իշխանությունների ներկայացուցիչներին:

Ողբերգության հանգամանքները պարզելու համար հուլիսի 17-ին Ազգային բյուրոն հանձնաժողով է ստեղծել Ուկրաինայի արտաքին գործերի նախարար Կլիմկինի գլխավորությամբ: Խմբի կազմում ընդգրկվել են նաև հանրապետության Պետական ավիացիոն ծառայության ներկայացուցիչները: Հանձնաժողովն ուղարկվել է դեպքի վայր: Ավելի վաղ նշվել է, որ Մալայզիան Կիև կուղարկի 62 մարդուց բաղկացած պատվիրակություն, որի մեջ կմտնեն մալայզիական ռազմաօդային ուժերի, ավիացիոն բնագավառի, բժշկական շրջանների ներկայացուցիչներ:

Հետաքննությանն օգնություն է առաջարկել նաև Եվրամիությունը: Եվրահանձնաժողովը նշում է, որ հետևում է ողբերգական պատահարի շուրջ ստեղծված իրադրությանը և սպասում է ՄԱԿ-ի Անվտանգության խորհրդի հատուկ նիստի արդյունքներին: Հուլիսի 18-ին նաև նշանակված է ԵԱՀԿ-ի արտահերթ հանդիպում: Կործանված ինքնաթիռի ուղևորների նորացված ցուցակում են՝ Նիդեռլանդների 173 հպատակ, 44 մալայզիացի, 27 ավստրալացի, 12 ինդոնեզացի, տասը բրիտանացի, Գերմանիայի չորս քաղաքացի, Բելգիայի չորս հպատակ, երեք ֆիլիպինցի, մեկական կանադացի և նորզելանդացի: Եվս 20 ուղևորի քաղաքացիությունն առայժմ չի պարզվել:

Ռուսաստանի արտաքին գործերի նախարար Սերգեյ Լավրովը հայտարարել է, որ Ռուսաստանը պնդելու է Boeing-777-ի աղետի բաց ու անկախ հետաքննությունը:

«Մալայզիայի ավիաուղիների» ինքնաթիռը Նիդերլանդներից Կիև կհասցնի Boeing-777-ի կործանման հետևանքով զոհվածների ազգականներին և նրանց հնարավորություն կընձեռվի այցելելու աղետի վայր: Այդ մասին հայտարարել է Նիդերլանդներում ավիաընկերության պաշտոնական ներկայացուցիչ Օդրի վան Վերդենբուրգը: