Թուրքիայի սահմանադրական դատարանը Հրանտ Դինքի սպանության գործով դատավարությունը խախտումներով անցկացված է ճանաչել

Թուրքիայի սահմանադրական դատարանը «Ակոս» թերթի խմբագրապետ Հրանտ Դինքի սպանության գործով դատավարությունը խախտումներով անցկացված է ճանաչել՝ այդ մասին վճռում նշելով, որ «արդյունավետ հետաքննություն չի անցկացվել»: Այս մասին, ինչպես հաղորդում է «Արմենպրես»-ը, հայտնում է «Ակոս» թերթը: Նշվում է, որ նման որոշման համար հիմք է հանդիսացել Դինքի ընտանիքի փաստաբանների անհատական բողոքները: Փաստաբաննե րը հայտնում են, որ սահմանադրական դատարանի այդ որոշումից հետո թուրքական դատախազությունը պետք է Դինքի սպանության գործով նոր՝ գործուն հետաքննություն սկսի:

Թուրքիայի սահմանադրական դատարանը Հրանտ Դինքի սպանության գործով դատավարությունը խախտումներով անցկացվելու մասին որոշումն ընդունել է միաձայն:

Մեկնաբանելով սահմանադրական դատարանի որոշումը՝ Դինքի ընտանիքի փաստաբաններից Հաքան Բաքըրջըօղլուն ասել է, որ Դինքի սպանության գործում ամենաանհրաժեշտ պահերից մեկն այն է, որ հասնեն ոճրագործության մեջ կասկածվող պետական պաշտոնյաների դատավարությանը, ինչը մինչ այժմ չէր հաջողվում: «Որոշումը դեռևս չի հրապարակվել: Եթե որոշումը մեր բողոքների հիման վրա ընդունվել է՝ կապված Ստամբուլի ոստիկանության տնօրինության և փոխնահանագապետի հետ, ապա պետք է այդ մարդկանց նկատմամբ դատական հայց նախապատրաստել», -ասել է փաստաբանը: