Boeing-ի կործանման կապակցությամբ Նիդերլանդների վարչապետը կարգադրել է խոնարհել երկրի դրոշները

Աշխարհ 18 Հուլիս, 2014 20:13

Ուկրաինայի տարածքում Boeing-777-ի կործանման կապակցությամբ Նիդեռլանդների վարչապետ Մարկ Ռյուտեն կարգադրել է խոնարհել կառավարական բոլոր շենքերի պետական դրոշները: Այդ մասին, ինչպես տեղեկացնում է «Արմենպրես»-ը, հուլիսի 18-ին հաղորդել է «Սինհուա» գործակալությունը:

Նրա տվյալների համաձայն՝ համապատասխան կարգադրությունն ուղղարկվել է Հոլանդիայի մունիցիպալիտետների իշխանություններին, ինչպես նաև արտասահմանում երկրի դիվանագիտական ներկայացուցչությունների ղեկավարությանը:

Ավելի վաղ հաղորդվել էր, որ Հոլանդիայի արտաքին գործերի նախարար Ֆրանս Թիմերմանսն Ուկրաինայի արևելքում մալայզիական ինքնաթիռի կործանումը «սև օր» է համարել Նիդեռլանդների համար և պահանջել է միջադեպի անկախ հետաքննություն անցկացնել: Նա նաև հայտնել է, որ Նիդեռլանդների ներկայացուցիչները Boeing 777-ի կործանման վայր անարգել մուտքի հնարավորություն են ստացել սեփական հետաքննությունն անցկացնելու համար: «Ես խոսել եմ Ուկրաինայի իմ պաշտոնակից Պավել Կլիմկինի հետ, որի հետ պայմանավորվել ենք, որ մեր մասնագետներն անարգել ու անվտանգ մուտք կունենան օդանավի կործանման վայր»,-ասել է նա՝ ճշտելով, որ ստեղծված իրավիճակում անհրաժեշտ է շահագրգիռ բոլոր կողմերի աջակցությունը: Արդեն Ուկրաինա են ուղարկվել հոլանդացի փորձագետ-քրեագետները:

Հուլիսի 17-ին Ուկրաինայի արևելքում կործանվել է Malaysia Airlines ընկերությանը պատկանող Boeing-777 ինքնաթիռը, որը Ամստերդամից թռչում էր Քուալա Լումպուր: Օդանավում գտնվում էր 298 մարդ, որոնցից 173-ը Նիդեռլանդների քաղաքացիներ էին, 44-ը՝ Մալայզիայի, 27-ը՝ Ավստրալիայի, 12-ը՝ Ինդոնեզիայի, 9-ը՝ Մեծ Բրիտանիայի, 4-ը՝ Գերմանիայի, 4-ը՝ Բելգիայի, 3-ը՝ Ֆիլիպինների, մեկական Կանադայի և Նոր Զելանդիայի քաղաքացիներ: Մնացած ուղևորների քաղաքացիությունը դեռևս չի պարզվել:

Ավելի վաղ Ավստրալիայի իշխանությունները հուլիսի 19-ը սգո օր են հայտարարել Ուկրաինայում մալայզիական Boeing ինքնաթիռի կործանումից հետո, որում եղել է երկրի 28 քաղաքացի: Հուլիսի 20-ին Սիդնեյի մայր տաճարում, ի հիշատակ ավիաաղետից զոհվածների, տեղի կունենա եկեղեցական արարողություն, որին կմասնակցի երկրի վարչապետ Թոնի Էբոտը, հաղորդել է ՌԻԱ Նովոստին: