Թուրքիայի նախագահի թեկնածու Էրդողանը նախընտրական արշավում հանդես է գալիս սադրիչ հայտարարություններով

Թուրքիայում օգոստոսի 10-ին անցկացվելիք նախագահական ընտրություններում իշխող «Արդարություն և զարգացում» կուսակցության թեկնածու առաջադրված՝ այդ երկրի վարչապետ Ռեջեբ Թայիբ Էրդողանը նախընտրական քարոզարշավի շրջանակում Թուրքիայի տարբեր շրջաններում կազմակերպված հանրահավաքներում ունեցած ելույթներում հանդես է գալիս սադրիչ հայտարարություններով:

Ինչպես հաղորդում է «Արմենպրես»-ը՝ վկայակոչելով թուրքական «Հուրիեթ» թերթը, Բուրսայում ընտրողների առաջ ունեցած ելույթում Էրդողանը հայտարարել է, որ Ուկրաինայի տարածքում «մալայզիական քաղաքացիական ինքնաթիռը կործանել է Ռուսաստանը»: Էրդողանը Մոսկվային մեղադրել է մալայզիական «Բոինգ»-ի կործանման մեջ՝ հայտարարելով, որ քաղաքացիական ինքնաթիռը վայր է գցվել ռուսների կողմից արձակված հրթիռից: «Ի՞նչ է եղել այդ ինքնաթիռում: Վայր է գցվում մի ինքնաթիռ, որը Հոլանդիայից մե կնում էր Մալայզիա: Սա ի՞նչ մոտեցում է: Ի՞նչ հասկացողություններ են: Չէ՞ որ ասում էին, թե պատրաստվում են խաղաղություն կառուցել ամբողջ աշխարհում»,- հայտարարել է Էրդողանը: Հոլանդիայից Մալայզիա մեկնող «Boeing777» ինքնաթիռը աղետի է ենթարկվել Ուկրաինայի արևելքում հուլիսի 17-ին, ինչի արդյունքում զոհվել են ինքնաթիռում գտնվող բոլոր՝ 298 ուղևորները:

Էրդողանը Իսրայելին էլ դատապարտել է Գազայի հատվածի հռթիռակոծման համար և Իսրայելի գործողություններն անվանել «ցեղասպանություն»: «Մի մոռացեք, որ ձեր դրած թակարդի մեջ մի օր կհայտնվեք դուք՝ ինքներդ», -սպառնացել է նա՝ նկատի ունենալով Արևմուտքին:

Էրդողանը նաև հայտարարել է, որ Արևմուտքը «նոր խաչակրաց» հարձակում է սկսել մահմեդականների դեմ: