«Էլմար Մամեդյարովը Ադրբեջանի ամենաանկարող արտգործնախարարներից է և պետք է հրաժարական տա». ադրբեջանցի կուսակցապետ

Աշխարհ 22 Հուլիս, 2014 0:29

Միացյալ Ադրբեջանի ժողովրդական ճակատ կուսակցության առաջնորդ, պատգամավոր Գուդրաթ Հասանգուլիևը հայտարարել է, որ Ադրբեջանի արտաքին գործերի նախարար Էլմար Մամեդյարովը «ադրբեջանական ներկայիս կառավարության կազմում ամենաանկարող նախարարներից մեկն է և պետք է հրաժարական տա»: Այս մասին, ինչպես հաղորդում է «Արմենպրես»-ը, ադրբեջանցի կուսակցապ ետը հայտարարել է moderator.az-ի հետ զրույցում:

Կոչ անելով հրաժարական տալ զբաղեցրած պաշտոնից՝ Հասանգուլիևը Էլմար Մամեդյարովի հասցեին սուր արտահայտություններ է օգտագործել:

«Նրա պահվածքից բռնած մինչև արած հայտարարություններն ու դեսպանատները ղեկավարելու ունակությունը ոչ մի բան տեղում չէ: Այդ մարդու արտաքինից մինչև նրա հայտարարությունները ոչ մեկին դուր չի գալիս», -ասել է նա՝ նշելով, որ ինքն անձանմբ Ադրբեջանի ԱԳՆ ղեկավարի անձի նկատմամբ ոչ մի խնդիր չունի:

Հասանգուլիևն ասել է, որ Ադրբեջանի դեսպանների մեջ ևս իրենց տեղում չգտնվող մարդիկ կան: «Եվրոպայում մեր որոշ դեսպաններ դեսպանատների շենքերն օգտագործում են սեփական բիզնեսը ստեղծելու ուղղությամբ իրենց կոմերցիոն նպատակների համար: Նրանցից շատերն այնքան անկարող են, որ Ադրբեջանի մասին ճշմարտությունները չեն կարողանում իրենց գործունեության երկրների ոչ թե առաջատար, անգամ միջին մակարդակի մամուլում հրապարակել: Բայց մենք այստեղ տեսնում ենք, թե ինչպես են կարողնում ԱՄՆ-ի և այլ երկրների դեսպանները պարբերաբար հանդիպել մամուլի, ընդդիմության ներկայացուցիչների, առաջատար լրագրողների, քաղաքացիական հասարակության ներկայացուցիչների, քաղաքական կուսակցությունների ղեկավարների հետ», -ասել է նա:

Գ. Հասանգուլիևի կարծիքով, որոշ դեսպաններ, Բաքվից հատուկ ցուցում չլինելու դեպքում, իրենց գործն ավարտած են համարում տարին մեկ անգամ միայն Հանրապետության օրը նշելով: «Նրանք ոչ միայն իրենց գործունեության երկրի, անգամ մեր սփյուռքի հետ նորմալ հարաբերություններ չեն կարողանում ստեղծել: Տեսեք, սփյուռքի կազմակերպությունների մեծ մասը հակամարտության մեջ է մեր դեսպանությունների հետ: Կարծում եմ, որ մեր դիվանագիտության համար պատասխանտու մարդկանց ընտրության ուղղությամբ անհրաժեշտ է լուրջ բարեփոխումներ կատարել», -ընդգծել է նա:

Հասանգուլիևը հայտարարել է, որ արգործնախարար Մամեդյարովը թույլ գտնվեց նաև Եվրոպայի խորհրդի նախարարների կոմիտեում նախագահության շրջանում: «Նրանից ոչ մի լուրջ կարծիք չլսեցինք Ադրբեջանի խնդիրների և միջազգային միությունից անկալիքների, ցանկությունների և պահանջների վերաբերյալ: Շատ ափսոս, որ հակառակ մեր սպասելիքներին, նա չկարողացավ մեզ իրեն ներկայացնել որպես երկրի գլխավոր դիվանագետ», -ասել է պատգամավորը:

Ադրբեջանական «Ազադլըգ» թերթը Ադրբեջանի ԱԳՆ ղեկավարի հասցեին պատգամավոր Հասնագուլիևի նման սուր արտահայտությունները կապել է այդ երկրի իշխանության «Նախիջևանի խմբավորման», որին պատկանում է նա և «Փաշաևների» (Ադրբեջանի առաջին տիկին Մեհրիբան Ալիևայի հայրական կլանը), որին պատկանում է Էլմար Մամեդյարովը, թևերի միջև գնալով աճող հակամարտությամբ:

«Այդ խմբավորումների միջև ժամանակ առ ժամանակ «փոխհրաձգություններ» են տեղի ունենում: Իշխանության որդեգրած քաղաքականության հարցում նրանց միջև հակասություն է առաջացել: Էլմար Մամեդյարովի հասեցին «Նախիջևանի խմբավորման» հարվածների պատճառը հստակ հայտնի չէ: Որոշ ենթադրությունների համաձայն, Ադրբեջանում առաջիկայում տեղի ունենալիք խորհրդարանական ընտրությունների հետ կապված՝ «Նախիջևանի խմբավորումը», որի ղեկավարը արտակարգ իրավիճակների նախարար Քեմալադդին Հեյդարովն է, ցանկանում է վերահսկողություն սահմանել նաև իշխա նության արտաքին քաղաքականության նկատմամբ», -նշել է «Ազադլըգ» թերթը: