Ինդոնեզիայի նախագահական ընտրություններում հաղթանակ է տարել Ջակարտայի նահանգապետ Ջոկո Վիդոդոն

Ջակարտայի հատուկ մայրաքաղաքային օկրուգի նահանգապետ Ջոկո Վիդոդոն հաղթանակ է տարել Ինդոնեզիայի նախագահի ընտրություններում: Այդ մասին, ինչպես տեղեկացնում է «Արմենպրես»-ը, վկայում են երկրի Կենտրոնական ընտրական հանձնաժողովի կողմից հրապարակված տվյալները:

Ինդոնեզիայի 34 նահանգներից 33-ում քվեաթերթիկների հաշվելու ընթացքում ստացված տվյալների համաձայն՝ Ջոկո Վիդոդոն, որը ինդոնեզացիների մեծամասնությանը հայտնի է Ջոկովի կարճ անվամբ, հավաքել է ընտրողների ձայների 53,15 տոկոսը: Նրա մրցակիցը՝ պաշտոնաթող գեներալ-լեյտենանտ Պրաբովո Սուբիանտոն, ստանում է ձայների 46,85 տոկոսը: Բոլոր քվեաթերթիկների հավման արդյունքները, ինչպես սպասվում է, կհրապարակվեն այսօր ավելի ուշ: Սակայն, ինչպես նշում են ընտրական հանձնաժողովի ներկայացուցիչները, դրանք որևէ ազդեցություն չեն կարողանա գործել ընտրությունների ընդհանուÖ € արդյունքի վրա:

Ինդոնզիայում ընտրությունները տեղի են ունեցել հուլիսի 9-ին: Սակայն աշխարհի ամենամեծ կղզեխմբի տարածքում ընտրատեղամասերի ցրվածության պատճառով ձայների հաշվումը տևել է մի քանի շաբաթ:

Նախագահական մրցարշավի հաղթողը՝ 53-ամյա Ջոկո Վիդոդոն, քաղաքական էլիտաների հետ չկապված «ժողովրդական քաղաքական գործչի» իմիջ ունի: Նա ծնվել է Ճավա կղզում հյուսնի ոչ հարուստ ընտանիքում: 12 տարեկանից Վիդոդոն սկսել է աշխատել՝ վաստակելով իր առաջին գումարները: Հաջ Մադի համալսարանի անտառտնտեսության ֆակուլտետն ավարտելուց հետո նա երկար ժամանակ զբաղվում էր կահույքի բիզնեսով:

2005 թվականին Վիդոդոն ընտրվել է իր հայրենի քաղաքի Սուրակարտի քաղաքագլուխ, որի բնակչությունը կես միլիոն էր: Քաղաքում անցկացվող սոցիալական բարեփոխումները մեծապես նպաստեցին սկսնակ քաղաքական գործչի ժողովրդականությանը: Օրինակ, նրա նախաձեռնությամբ Սուրակարտում բժշկական ապահովագրության համակարգ մտցվեց բոլոր բնակիչների համար: Վիդոդոն քաղաքագլուխ վերընտրվեց 2010 թվականին՝ ստանալով ընտրողների ձայների 90 տոկոսը: Իսկ 2012 թվականի սեպտեմբերի 20-ին դարձավ Ջակարտայի հատուկ մայրաքաղաքային օկրուգի նահանգապետը:

Քաղաքական գործիչը շատ հասարակ է հագնվում, սիրում է կրել մարզակոշիկներ և երաժշտության բոլոր ոճերից նախընտրում է հևի-մետալը: Նա հպարտանում է, որ շատ ժամանակ է անցկացնում հետնախորշերում և քաջատեղյակ է հասարակ ինդոնեզացիների ակնկալիքներին:

Վիդոդոն ամուսնացած է, ունի երեք երեխա: Նախագահի պաշտոնին նա առաջադրվել է Ինդոնեզիայի դեմոկրտական կուսակցության կողմից, որը հաղթանակ է տարել ապրիլյան խորհրդարանական ընտրություններում: Նրան նաև աջակցել են Ժողովրդական խղճի կուսակցությունը, Ազգային դեմոկրատական կուսակցությունը և Ազգային զարթոնքի կուսակցությունը:

Վիդոդոյի հետ զույգով՝ որպես փոխնախագահի պաշտոնի թեկնածու, առաջադրվել էր Ինդոնեզիայի ամենահարուստ մարդկանցից մեկը՝ Յուսուֆ Կալլան: Նրան չի կարելի նորեկ համարել մեծ քաղաքականության մեջ, նա 2004-ից մինչև 2009 թվականը արդեն եղել է Ինդոնեզիայի փոխնախագահը՝ աշխատելով ներկայում հեռացող նախագահ Սուսիլո Բամբանգ Յուդոյոնոյի թիմում, հաղորդել է ԻՏԱՌ-ՏԱՍՍ-ը: