Գերմանացիները, ֆրանսիացիները և բրիտանացիները պատրաստ չեն ԵՄ-ի կազմ նոր անդամներ ընդունելուն

Գերմանիայի բնակիչների մեծամասնությունը և Ֆրանսիայի ու Մեծ Բրիտանիայի բնակիչների շուրջ կեսը բացասաբար են վերաբերվում Եվրամիությանը Մոլդովայի, Վրաստանի և Ուկրաինայի անդամակցելու հեռանկարին: Այդ մասին, ինչպես տեղեկացնում է «Արմենպրես»-ը, վկայում են հարցման տվյալները, որն ICM Research գործակալությունն անցկացրել է «Ռոսիա սեգոդնյա» միջազգային լրատվական գործակալության պատվերով:

Վրաստանը, Ուկրաինան և Մոլդովան հունիսի 27-ին համաձայնագրեր են ստորագրել ԵՄ-ի հետ ասոցացման մասին, որոնց բաղադրիչն են ազատ առևտրի գոտու վերաբերյալ համաձայնագրերը: Վրաստանը և Մոլդովան արդեն վավերացրել են այդ փաստաթղթերը, բոլոր երեք երկրներն իրականացնում են բարեփոխումներ, որպեսզի համապատասխանեն այն պահանջներին, որոնք Եվրամիությունն առաջադրում է ԵՄ-ին անդամագրվել ցանկացողներին:

Եվրոպայի երեք առաջատար երկրներում՝ Գերմանիայում, Ֆրանսիայում և Մեծ Բրիտանիայում. անցկացված հարցումը ցույց է տալիս, որ այդ պետությունների բնակիչները հիմնականում կասկածում են ԵՄ-ում Վրաստանին, Մոլդովային և Ուկրաինային ընդունելու անհրաժեշտությանը: ԵՄ-ի ընդլայնմանն ամենից քիչ են պատրաստ գերմանացիները: «Պաշտպանում եք դուք արդյոք ԵՄ-ի կազմում նոր անդամների, ինչպես, օրինակ, Վրաստանի, Ուկրաինայի և Մոլդովայի ընդունումը» հարցին դրական պատասխան է տվել հարցվածների միայն մոտվորապես 1 տոկոսը: Եվս 21 տոկոսը պատասխանել է՝ «ավելի շուտ պ աշտպանում եմ», իսկ 71 տոկոսը բացասական պատասխան է տվել նշված հարցին:

Ֆրանսիայի և Մեծ Բրիտանիայի բնակիչների հարցման արդյունքները ցույց են տվել, որ այդ երկրներում Եվրամիության ընդլայնման հարցում լավատեսորեն տրամադրվածների թիվն ավելի մեծ է. երկու երկրներում էլ «կողմ» է արտահայտվել հարցվածների շուրջ 38 տոկոսը: Սակայն հարցախույզին մասնակցած ֆրանսիացիների 47 տոկոսը և Մեծ Բրիտանիայի բնակիչների 45 տոկոսը չեն պաշտպանել նախկին խորհրդային հանրապետությունների եվրաինտեգրացման հեռանկարը:

Հարցումները ICM Research-ի կողմից այս տարվա հուլիսի 11-ից մինչև 24-ն անցկացվել են Ֆրանսիայում, Մեծ Բրիտանիայում և Գերմանիայում: Դրան մասնակցել է 16-ից բարձր տարիքի (Մեծ Բրիտանիայում՝ 18-ից բարձր տարիքի) 3007 մարդ (1000 մարդ՝ Մեծ Բրիտանիայում, 1006 մարդ՝ Գերմանիայում, 1001 մարդ՝ Ֆրանսիայում), հաղորդել է ՌԻԱ Նովոստին: