Չինաստանում «Ռամասուն» թայֆունի զոհերի թիվը հասել է 62-ի

Ըստ վերջին տվյալների՝ Չինաստանում մոլեգնող «Ռամասուն» թայֆունի զոհ է դարձել 62 մարդ: Այդ մասին, ինչպես տեղեկացնում է «Արմենպրես»-ը, հուլիսի 25-ին հաղորդել է «Սինխուա» գործակալությունը՝ վկայակոչելով ՉԺՀ-ի քաղաքացիական վարչակազմի նախարարությունը:

Ավելի վաղ հաղորդվել էր 46 զոհվածների մասին: Եվս 21 մարդ անհետ կորած է համարվում:

Գերատեսչության տվյալներով՝ վերջին 40 տարվա ընթացքում ամենաուժեղ թայֆունն արդեն վնաս է պատճառել Չինաստանի Գուանդունի, Հայնանի, Յունանի նահանգների և Գուանսի-Չժուանի ինքնավար շրջանի ավելի քան 11 մլն բնակիչների: Ըստ նախնական գնահատումների՝ տարերքի պատճառած վնասը կազմում է 6,2 մլրդ դոլար:

Ավելի քան 820 հազար բնակիչներ տեղատարափ անձրևների ու հեղեղումների պատճառով հարկադրված են եղել լքել իրենց տները, 261 հազար մարդ առաջին անհրաժեշտության իրերի կարիք ունի:

Հորդառատ անձրևները մինչ այժմ ոչնչացրել են 37 հազար տուն: Թայֆունից տուժած շրջաններում մասնակիորեն վնասված են ենթակառուցվածքի օբյեկտներն ու ճանապարհները, նկատվում են էլեկտրականության և ջրի մատակարարման ընդհատումներ:

Ավելի վաղ հաղորդվել է, որ «Ռամասուն» թայֆունը մոլեգնել է Ֆիլիպիններում և Վիետնամում, որտեղ ընդհանուր առմամբ տարերքի զոհ է դարձել ավելի քան 60 մարդ, հաղորդել է ՌԻԱ Նովոստին: