Իսլամիստները Մոսուլում իջեցրել են հայկական եկեղեցու խաչը և այն վերածել քարոզչական կենտրոնի

Իրաքի հյուսիսային շրջաններում «Իսլամական պետություն» հռչակած «Իրաքի և Լևանտի իսլամական պետություն» (ԻԼԻՊ) կոչված սունի ահաբեկչական խմբավորումը Մոսուլում հայկական եկեղեցու վրայից իջեցրել է խաչը և այն վերածել կազմակերպության քարոզչական կենտրոնի: Այս մասին, ինչպես հաղորդում է «Արմենպրես»-ը, հայտնում է թուրքական Media365 լրատվական կայքը:

Նշվում է, որ ԻԼԻՊ-ի զինյալները հայկական եկեղեցու խաչի տեղում բարձրացրել են խմբավորման դրոշը:

Կայքը հայտնում է, որ ԻԼԻՊ-ի զինյալները ֆեթվա (կրոնական հրովարտակ) են հրապարակել, որի պահանջով իրենց վերահսկողության տակ գտնվող 11-46 տարեկան մոտ 4 մլն կանանց և աղջիկների պետք է բռնի թլփատման ենթարկել: «Իսլամական պետության» քաղաքներում արգելված է ծխախոտ և նարգիլե ծխելը, բոլոր սրճարանները փակվել են, կանայք պարտավոր են գլխաշոր կրել:

Թուրքական ԶԼՄ-ները հայտնել են, որ ԻԼԻՊ-ի զինյալները Մոսուլում պայթեցրել են Յունուս մարգարեի դամբարանը, որը շիաների սրբավայր է: Իսլամիստ սունի ահաբեկիչները շիաների բազմաթիվ սրբավայրեր են ավերել նաև իրենց զավթած Թելաֆեր և Քիրքուկ քաղաքներում: Յունուս մարգարեի դամբարանի ավերումը իրաքցիների հակազդեցության պատճառ է դարձել: Դամբարանը, որը ծառայում էր որպես մզկիթ, կառուցվել է հիջրայի 134 տարում և զբոսաշրջիկների այցելության վայր էր: Ահաբեկիչները պայթեցրել են նաև մզկիթում գտնվող Յունուս մարգարեի գերեզմանը: