Գևորգ Կոստանյանը չի պատրաստվում ուրախացնել նախկին և ներկա կաշառակերներին

ՀՀ գլխավոր դատախազ Գևորգ Կոստանյանին Մարդու իրավունքների Եվրոպական դատարանում Հայաստանի դատավոր նշանակելու հարցով որևէ քննարկում չի եղել: Կառավարության նիստից հետո լրագրողների հետ զրույցում Կոստանյանն անդրադառնալով շրջանառվող լուրերին՝ նշեց, որ եվրոպական դատարանում դատավոր նշանակվելու վերաբերյալ լուրերն արդեն տասը տարի է շարունակվում են: «Նման գործնական քննարկում երբեք չի եղել, և ես, անկեղծ ասած, չեմ էլ պատրաստվում ուրախացնել նախկին և ներկա կաշառակերներին, կոռուպցիոն և այլ հանցավոր դրսևորումներ ունեցող անձանց, որոնք շատ կուզենան, ինձ այս պաշտոնին չտեսնել. ես ոչ մի անուն չեմ նշում: Կարծում եմ՝ յուրաքանչյուրը գիտի, ես կարծում եմ և ես վստահ եմ, որ իմ գործունեությունը, անկախ նրանից՝ ով գոհ կամ դժգոհ կլինի, շարունակելու եմ առնվազն նույն հետևողականությամբ և ոգևորվածությամբ, և դա տարածվելու է ոչ միայն դատախազական համակարգի վրա, այլև իրավապահ մյուս համակարգերի, այդ թվում՝ քննչական և պետական այլ մարմինների նկատմամբ»,- «Արմենպրես»-ի հաղորդմամբ՝ ասաց Կոստանյանը:

ՀՀ գլխավոր դատախազի խոսքով՝ ով կոգևորվի կամ կերջանկանա իր որևէ տեղ գնալու լուրերով կամ դիտավորյալ նման ապատեղեկատվություն կտարածի, դա իրեն չի մտահոգում:

«ՀՀ գլխավոր դատախազ Գևորգ Կոստանյանը ՄԻԵԴ-ում ՀՀ կառավարության ներկայացուցիչն է, նա նաև ընդգրկված է «ՄԻԵԴ-ի դատավորի պաշտոնում ՀՀ կողմից առաջադրվող թեկնածուների ընտրությունն իրականացնող հանձնաժողովում» և չի պատրաստվում փոխարինել Ալվինա Գյուլումյանին»,- այսօր ավելի վաղ պարզաբանել էր ՀՀ գլխավոր դատախազի խորհրդական Քրիստինե Մելքոնյանը: