ԲՀԿ-ական պատգամավորի որդին հուլիսից հետախուզման մեջ էր. Փաստինֆո

ԱԺ «Բարգավաճ Հայաստան» խմբակցության անդամ, «Սև հովազ» ջոկատի նախկին հրամանատար Ռուստամ Գասպարյանի որդին' Ռոմա Գասպարյանը ձերբակալվել է դեռևս այս տարի ամռանը՝ հուլիսին հարուցված քրեական գործի շրջանակներում:

Այս մասին «Փաստինֆո»-ին հայտնեցին ՀՀ Քննչական կոմիտեից՝ հավելելով, որ 2014թ. հուլիսի 7-ին նախաքննական մարմնի կողմից որոշում էր կայացվել՝ Ռոման Գասպարյանին որպես մեղադրյալ ներգրավելու մասին' ՀՀ Քրեական օրենսգրքի 131-րդ հոդվածի 2-րդ մասի 1-ին կետով, այն է' մի խումբ անձանց կողմից նախնական համաձայնությամբ մարդուն առևանգելը:

Նույն օրը Երևան քաղաքի Մալաթիա-Սեբաստիա վարչական շրջանների ընդհանուր իրավասության առաջին ատյանի դատարանի կողմից Ռոման Գասպարյանի նկատմամբ որպես խափանման միջոց է ընտրվել կալանավորումը: Միևնույն ժամանակ նրա նկատմամբ հայտարարվել է հետախուզում:

Իսկ երեկ' 16.09.2014թ.՝ ժամը 16:40-ին, Ռոման Գասպարյանը հայտնաբերվել և բերման է ենթարկվել ՀՀ ոստիկանության քրեական հետախուզության գլխավոր վարչություն: Այսօր նրան արդեն մեղադրանք է առաջադրվել:

Ի դեպ, հետախուզվողի հայրն այսօր մամուլին ասել է, որ իր որդին այդ ամբողջ ընթացքում գտնվել է Հայաստանում, թաքնվել է իրենց տանն ու տնից դուրս չի եկել:

Ինչ վերաբերում է որդուն առաջադրված մեղադրանքին, ԲՀԿ-ական պատգամավորը հերքել է առևանգման մեղադրանքը' նշելով, որ իր որդին ոչ մեկին չի առևանգել և բանսարկության զոհ է: