Նորմատիվային փաստաթուղթ ունենք, որն ընդունվել է Խռուշչովի ժամանակ. Իշխան Զաքարյան

ԱԺ Տնտեսական հարցերի մշտական հանձնաժողովում այսօր քննարկման դրվեց Քաղաքաշինության և Կապի և տրանսպորտի նախարարություններում Վերահսկիչ պալատի 2013 թվականին արված ուսումնասիրության արդյունքները:

ՎՊ նախագահ Իշխան Զաքարյանն՝ անդրադառնալով Տրանսպորտի և կապի նախարարություն արված ուսումնասիրությունների արդյունքներին, նշեց, որ այս դեպքում կրկին գործել է նախարարություն-ՎՊ համագործակցությունը:

«Մենք, երբ քննակում էինք ԿԳՆ-ի հետ կապված խնդիրները, ես ասացի, որ այդ նախարարության հետ ՎՊ-ն ընթացիկ վերահսկողության ռեժիմով աշխատել է յոթ ծրագրի վրա և լավ արդյունք է տվել, որովհետև, ընթացքում խնդիրները շտկելով, գնացել ենք առաջ: Այս դեպքում պետք է ասեմ, որ 2013 թվականին ՎՊ-ի հանձնաժողովը և Տրանսպորտի և ԿԳ նախարարի կողմից կազմակերպված հանձնախմբերը նայել են ճանապարհների պահպանման ընթացիկ իրականացված աշխատանքները, և այդ համատեղ ստուգումը բավականին լավ արդյունք է տվել: Մենք հինգ մարզում համատեղ ստուգումներն արել ենք հենց տեղում, շինարարներն իրենց կողմից իրականացված թերությունները վերացրել են, եթե եղել են որոշ պատիժներ՝ դրանք անմիջապես վերականգնվել են, և խնդիրը վերացել է»,- ասաց Իշխան Զաքարյանը:

Հաշվետվության արդյունքներին անդրադարձավ նաև Կապի և տրանսպորտի նախարար Գագիկ Բեգլարյանը. «ՎՊ-ի հետ համատեղ աշխատանքում, ինձ թվում է, որ արձանագրվել է բարձր առաջընթաց»,- ասաց նա:

Ամփոփելով երկու ոլորտների վերաբերյալ քննարկումները՝ Իշխան Զաքարյանն ասաց. «Մենք քննարկեցինք քաղաքաշինության և տրանսպորտի ոլորտներին առնչվող 2013 թվականի ստուգումների արդյունքները: Առաջինը, որ հստակ ամրագրում ենք, երկու դեպքում էլ մենք ծավալային հավելագրումների հետ կապված հասել ենք գրեթե նվազագույնի շեմին, սա բավականին դրական և լավ տեղաշարժ է, որովհետև մենք տարիներ շարունակ խոսել ենք ծավալային հավելագրումների բարձր տոկոսների մասին: Երկրորդ՝ արդյո՞ք սա նշանակում է, որ շինարարության ոլորտում մենք խոսելու ենք հարթ ու շիտակ լինելու մասին, իհարկե՝ ոչ»,- նշեց ՎՊ նախագահը:

Վերջինիս կարծիքով՝ մյուս խնդիրը վերաբերում է դպրոցաշինության ծրագրին:

«Կարծում եմ, որ այն մոտեցումը, ինչի մասին խոսեց պարոն նախարարը, շատ ճիշտ ճանապարհ է, որպեսզի մենք վերջիվերջո կարողանանք 74 դպրոցի ութ տարի շարունակվող շինարարությունն ինչ-որ հանգրվանի հասցնել: Հասկանում ենք, որ տարեկան բյուջեով այնքան գումար չեն տրամադրելու Քաղաքաշինության նախարարությանը, որ դա միանգամից ավարտվի, բայց գոնե եղած գումարի սահմաններում մենք հստակ կարողանանք ֆիքսել, արձանագրել, որ ենթադրենք հինգ կամ վեց դպրոցը մինչև տարվա վերջ ավարտում ենք կամ ավարտելու ենք հաջորդ տարվա կեսին:

Նորմատիվային փաստաթղթերի հետ կապված, կարծում եմ, այստեղ խնդիրներ կան: Նորմատիվային փաստաթուղթ ունենք, որ ընդունվել է Խռուշչովի ժամանակ և մինչև հիմա կիրառվում է: 170 փաստաթղթից 134-ն ընդհանրապես վերանայված չեն, վերանայվածների ժամկետներն էլ արդեն վաղուց անցել են, պարունակո՞ւմ են արդյոք այս նորմատիվային փաստթղթերը շինարարության ոլորտում որոշակի ռիսկեր, իհարկե պարունակում են, և այս խնդիրները, որոնց մասին խոսեցինք, ունեն նաև մասնագիտական լուրջ քննարկումների կարիք, որտեղ ՎՊ-ն իր պատրաստակամությունը հայտնել է իր մասնագետների, կարողությունների սահմանում օգնելու և օժանդակելու»,- եզրափակեց Իշխան Զաքարյանը: