ՄԻԵԴ-ում ՀՀ կողմից առաջադրվող 3 թեկնածուների անունները հայտնի կդառնան այսօր

ՄԻԵԴ-ում ՀՀ կողմից առաջադրվող թեկնածուների ընտրությունն իրականացնող մրցութային հանձնաժողովի որոշման արձանագրությունը կհրապարակվի այսօր' հոկտեմբերի 8-ին: Ինչպես «Արմենպրես»-ին տեղեկացրին Արդարադատության ակադեմիայի հանրային կապերի բաժնից, արձանագրության մեջ կներկայացվեն ինչպես հարցազրույցի փուլն անցած մասնակիցների միավորները, այնպես էլ այս օրերին բարձրացված հարցերի վերաբերյալ հանձնաժողովի դիրքորոշումը:

Հոկտեմբերի 7-ի երեկոյան ավարտվել է Մարդու իրավունքների եվրոպական դատարանում Հայաստանի դատավորի պաշտոնի համար անցկացվող մրցույթի հարցազրույցի փուլը: Երկու օր շարունակ ՀՀ Վճռաբեկ դատարանի Մխիթար Գոշի անվան գրադարանում սահմանված կարգով անցկացվող հարցազրույցի ընթացքում դատավորի թեկնածուները ներկայացրել են մարդու իրավունքների բնագավառում ունեցած իրենց աշխատանքային փորձն ու հմտությունները, պատասխանել հանձնաժողովի անդամների հարցերին, որոնք նպատակ ունեին բացահայտելու մասնակիցների մասնագիտական ունակությունները, ինչպես նաև ցույց են տվել իրենց լեզվական հմտությունները անգլերեն և/կամ ֆրանսերենից (բանավոր և գրավոր):

Թեկնածուները, պատասխանելով հանձնաժողովականների հարցերին, ներկայացրել են իրենց դիրքորոշումը Հայաստանում անկախ դատական համակարգ ունենալու վերաբերյալ, դատարանի նկատմամբ անվստահությունը մեղմելուն ուղղված քայլերը՝ այդ համատեքստում կարևորելով մարդու իրավունքների պաշտպանությունը, ՄԻԵԴ նախադեպային իրավունքի կիրառումը:

Մրցութային հանձնաժողովի անդամ, ՍԴ նախագահ Գագիկ Հարությունյանի հարցն ուղղված է եղել բոլոր թեկնածուներին. բացահայտել արդարություն, իրավահավասարություն, ժողովրդավարություն եզրույթների նորմատիվային բնույթը: Հիմնվելով տեսական գիտելիքի ու աշխատանքային փորձի վրա՝ հարցի առնչությամբ թեկնածուները ներկայացրել են իրենց մոտեցումները:

«Ձեր պրակտիկայում ՄԻԵԴ նախադեպային որոշումը կիրառելու հնարավորություն ունեցե՞լ եք»,- հետաքրքրվել է հանձնաժողովի անդամ, Արդարադատության ակադեմիայի ռեկտոր Ռուբեն Մելիքյանը՝ փորձելով այդ առնչությամբ լսել թեկնածուների մեկնաբանություններն ու վերլուծությունը: Ռուբեն Մելիքյանի այն հարցին, թե թեկնածուներն ինչ ներդրում են ունեցել Հայաստանում իրավունքի զարգացման գործում, հնչել են տարբեր պատասխաններ: Թեկնածուները ներկայացրել են այն փորձագիտական հետազոտությունները, որոնք կատարել են, մոնիթորինգային խմբերում կատարած աշխատանքը, տարբեր զեկույցների պատրաստումն ու քննարկումները, որոշ դեպքերում՝ նաև օրենսդրական նախաձեռնություններին ունեցած մասնակցությունը:

Հանձնաժողովի անդամ, Մարդու իրավունքների պաշտպան Կարեն Անդրեասյանի հարցն ուղղված է եղել բոլոր թեկնածուներին. «Որո՞նք են հասարակական այն երեք արատները, որոնք խոչընդոտում են Հայաստանում մարդու իրավունքների պաշտպանությանը»: Ըստ թեկնածուների՝ խնդիրները տարբեր են, կոռուպցիայից մինչև դատարանների նկատմամբ անվստահությունը:

Հարցազրույցի փուլին մասնակցել է 11 թեկնածու. Արմեն Հարությունյան (Կենտրոնական Ասիայում ՄԱԿ-ի Մարդու իրավունքների հանձնակատարի տարածաշրջանային ներկայացուցիչ, Ուկրաինայում Մարդու իրավունքների մշտադիտարկման ՄԱԿ-ի առաքելության ղեկավարի ժամանակավոր պաշտոնակատար, իրավաբանական գիտությունների դոկտոր), Արայիկ Ղազարյան («Իրավունքի գերակայություն իրավապաշտպան հասարակական կազմակերպության և Ֆորում իրավունքի կենտրոն հասարակական կազմակերպության մասնակից), Նելիկ Հարությունյան (ՀՀ գլխավոր դատախազության միջազգային-իրավական կապերի բաժնի պետ), Վիգեն Քոչարյան (ԵՊՀ եվրոպական և միջազգային իրավունքի ամբիոնի վարիչ, դասախոս), Լիզա Գրիգորյան (Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանի դատավոր), Վահե Գրիգորյան (փաստաբան), Դավիթ Խաչատուրյան (Արդարադատության ակադեմիայի պրոռեկտոր, դասախոս), Արայիկ Մելքումյան (Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր), Դավիթ Հակոբյան (Հարկ վճարողների և գործարարների իրավունքների պաշտպանության հասարակական կազմակերպության իրավախորհրդատու), Եղիշե Կիրակոսյան (ՀՀ Սահմանադրական դատարանի խորհրդական), Նորա Կարապետյան (Երևան քաղաքի Մալաթիա-Սեբաստիա վարչական շրջանի ընդհանուր իրավասության դատարանի դատավոր):

Այսօր' հոկտեմբերի 8-ին հայտնի կդառնան այն 3 թեկնածուների անունները, որոնք կներկայացվեն ՀՀ նախագահին: