Ավելի լուրջ մոտենալ սահմանադրական բարեփոխումների հայեցակարգին. Դավիթ Հարությունյանի կոչը

ՀՀ կառավարության աշխատակազմի ղեկավար-նախարար Դավիթ Հարությունյանը ոչ իշխանական եռյակի քաղաքական ուժերին կոչ է անում ավելի լուրջ մոտենալ սահմանադրական բարեփոխումների հայեցակարգին: Ազգային ժողովում լրագրողների հետ զրույցում Դավիթ Հարությունյանը, պատասխանելով այն հարցին, թե ոչ իշխանական եռյակը պնդում է, որ իշխանությունները Սահմանադրությունը փոխում են՝ ելնելով իրենց համար նպատակահարմարությունից, ընդգծեց, որ բոլոր նրանք, ովքեր այդպիսի պնդումներ են անում, պետք է սահմանադրական բարեփոխումների հայեցակարգում հայտնաբերեն նման հատված, որը մտահոգության տեղիք է տալիս: «Ճիշտ չէ առանց փաստաթուղթն ուսումնասիրելու քննարկել, առավել ևս քննադատել այն։ Փնովել կարելի է ցանկացած փաստաթուղթ՝ առանց կարդալու։ Կարծում եմ, ժամանակն է, որ քաղաքական ուժերը լրջորեն մոտենան հայեցակարգին, և եթե կան թերի կողմեր՝ բարձրաձայնեն։ Մենք կարող ենք քննարկել ցանկացած դրույթ․ այսօր ինձ թվում է՝ փաստաթուղթը բավականին «եփված է», որն արժանի է շատ ավելի լուրջ մասնագիտական քննարկումների»,- «Արմենպրես»-ի հաղորդմամբ՝ նշեց Հարությունյանը:

Անդրադառնալով ՀԱԿ առաջնորդ Լևոն Տեր-Պետրոսյանի դիտարկմանը, թե «միայն հիմարը կամ իրեն հիմարի տեղ դնողը կարող է ասել, որ այս ամենն արվում է երկրի ու ժողովրդի բարօրության համար», Հարությունյանն այսպես պատասխանեց. «Այն, որ ցանկացած լուրջ քննարկման ժամանակ, եթե ասում եք ընդամենը գնահատական և ոչ թե բովանդակային քննադատություն, դա խոսում է հենց այդ գնահատականի արժեքի մասին: Նման մեղադրանքներ կարելի է հնչեցնել ցանկացած փաստաթղթի վերաբերյալ՝ անգամ ծանոթ չլինելով դրան։ Ցավով եմ նշում, բայց ՀՀ առաջին նախագահը ոչ թե չի ծանոթացել փաստաթղթին, այլ ուղղակի նման խնդիր իր առջև չի դրել, դրա համար էլ նման գնահատականներ է հնչեցրել»: