ՄԻՊ-ն ու քննչական կոմիտեն ստորագրած հուշագրով կպաշտպանեն մեղադրյալի օրինական իրավունքները

ՀՀ քննչական կոմիտեի և ՀՀ մարդու իրավունքների պաշտպանի գրասենյակի միջև ստորագրվեց մարդու իրավունքների և ազատությունների պահպանման ոլորտում համագործակցության վերաբերյալ Փոխըմբռնման հուշագիր: Կողմերի հավաստմամբ' այդ փաստաթղթով նախանշում են այն կառուցակարգերը, որոնք անհրաժեշտ են մարդու իրավունքների պաշտպանության և խախտված իրավունքների վերականգնումն ապահովելու համար:

ՀՀ քննչական կոմիտեի նախագահ Աղվան Հովսեփյանը հավաստեց, որ փաստաթղթի ստորագրմամբ կարևոր քայլ է կատարվում մարդու իրավունքների պաշտպանության առումով: «Հատկապես նախաքննության ընթացքում մարդիկ առնչվում են սահմանադարական իրավունքի պահպանության անհրաժեշտության հետ, քանի որ քննչական գործողություններուվ ու միջոցառումներով հնարավոր է դառնում այդ իրավունքների սահմանափակումը: Խոսքը գնում է մարդու ազատ տեղաշարժման, անձեռմխելիության, փոստահեռագրային առաքումների գաղտնիության իրավունքների մասին: Այս պատճառով օրենսդիրը նախաքննության մարմնի յուրաքանչյուր գործողություն կանոնակարգում է օրենքով, որ ներքին գերատեսչական ակտերով հնարավոր չլինի այդ կանոնակարգերն այլ կերպ մեկնաբանել»,-ասաց Աղվան Հովսեփյանը:

Նրա խոսքով' պետք է հասնել նրան, որ քննիչը ինչ պատասխանատվությամբ որ ձեռք է բերում ապացույցներ մեղադրանքը հիմնավորելու համար, նույնքան շահագրգռվածությամբ էլ աշխատանք տանի արդարացնող ապացույցներ ձեռք բերելու ուղղությամբ: «Այսինքն' ձեռք բերի ինչպես ծանրացնող, այնպես էլ մեղմացնող ապացույցներ ու հանգամանքներ' իրեն օրենքով ընձեռված կանոնակարգերով»,- «Արմենպրես»-ի հաղորդմամբ' նշեց ՀՀ քննչական կոմիտեի նախագահը:

Աղվան Հովսեփյանը հույս հայտնեց, որ այսուհետ կկարողանան միասին քննել այն գանգատներն ու դիմումները, որ ստանում է թե Քննչական կոմիտեն, թե Մարդու իրավունքների պաշտպանի գրասենյակը: «Արդեն ունենք պայմանավորվածություն, որ ժամանակ առ ժամանակ կուտակված բազմաքանակ հարցերով դիմումները քննարկենք միասին ու միասին ընդունենք դիմումներ ներկայացրած քաղաքացիներին, որպեսզի նույն ակտիվությամբ կարողանանք պաշտպանել մեղադրյալի օրինական իրավունքներն ու շահերը»,- շեշտեց Աղվան Հովսեփյանը:

Մարդու իրավունքների պաշտպան Կարեն Անդրեասյանն էլ նշեց, որ մեծ ակնկալիքներ ունեն Քննչական կոմիտեի հետ համագործակցությունից: «Քննչական կոմիտեն նոր մարմին է' չնայած ունի փորձառու ղեկավար ու աշխատակիցներ, բայց ամեն նոր սկիզբ նոր դրականի ակնկալիք է, և մենք նոր ակնկալիքներով ենք սկսում համագործակցությունն այս կառույցի հետ: Մեզ համար կարևոր է շեշտել այն, որ օրենքն արդեն իսկ նախատեսել է շատ կարգավորումներ, բայց ամեն օրենք ու ամեն մարմին ունենում է հայեցողության որոշակի շրջանակ, և դա օգտագործել ի օգուտ մարդու իրավունքներն, արդեն ամեն մարմին ու ամեն մարմնի ղեկավարի որոշելիքն է: Ուրախ ենք տեսնել, որ կա ցանկություն' գործելու ի շահ մեր դիմումատուների, մեր քաղաքացիների: Մենք այստեղ ենք այն հույսով, որ մեծ աշխատանք է կատարվելու, այս ամենն ուղղակի չի մնա թղթի վրա»,- ընդգծեց Կարեն Անդրեասյանը:

Նա կարևորեց, որ միայն երկու կառույցների ղեկավարների, այլև դրանց աշխատակազմերի շփումները: