«Ադրբեջանցի դիվերսանտները չէին սպասում այդչափ դրական վերաբերմունքի իրենց նկատմամբ»

Ադրբեջանցի կալանավորված դիվերսանտները չէին սպասում այդչափ դրական վերաբերմունքի իրենց նկատմամբ: «Ես անձամբ ներկա եմ եղել ադրբեջանցի դիվերսանտների դատավարությանը և պետք է փաստեմ, որ դատավորը գերազանց է կատարում իր լիազորությունները, իսկ տուժող կողմը իրեն շատ արժանապատիվ է պահում և միայն մեկ անգամ էր, որ անչափահաս Սմբատ Ցականյանի մայրը չդիմացավ և արտահայտվեց»,- «Արմենպրես»-ի հաղորդմամբ՝ լրագրողների հետ նոյեմբերի 26-ին կայացած հանդիպմանը հայտնեց «Ընդդեմ իրավական կամայականությունների» ՀԿ նախագահ Լարիսա Ալավերդյանը և հավելեց, որ Լեռնային Ղարաբաղի Հանրապետությունը մեղադրյալների նկատմամբ պահպանում է միջազգային բոլոր նորմերը, ինչը վկայում են նաև ադրբեջանցիների դիվերսանտների անկաշկանդ, չճնշված պատասխանները դատավարության ժամամակ:

Փորձագետը նշեց, որ ինքը առաջարկել է մի քանի միջազգային հասարակական կազմակերպությունների գալ Լեռնային Ղարաբաղի Հանրապետություն և հետևել ադրբեջանցի դիվերսանտների դատավարությանը, սակայն արդեն երկու մերժում է ստացել։ «Եթե մարդ այլ երկրում անազատության մեջ է, ապա միջազգային հասարակական կազմակերպությունները պետք է անպայման այցելեն իրեն, սակայն նրանք ընդհանրապես չեն հետաքրքրվում այս հարցով: Շատ կարևոր է, որ նրանք տեսնեն, որ ադրբեջանցի կալանավորված դիվերսանտներին լավ են վերաբերվում և դրա մասին հայտնեն դիվերսանտների ազգակիցներին, և դա նաև կօգնի մեզ ինչ-որ ձևով սանձել Ադրբեջանից եկող ապատեղեկատվությունը»,- ասաց Լարիսա Ալավերդյանը և հավելեց որ, մենք պետք է ավելի հաճախ դիմենք միջազգային հասարակական կազմակերպություններին, որպեսզի նրանք հասկանան, որ մենք մեզ նույնպես համարում ենք միջազգային հանրության լիիրավ անդամներից մեկը։

Հունիսի 29­-ին Ադրբեջանի Հանրապետության հետախուզության առաջադրանքով նույն պետության քաղաքացիներ Դիլհամ Գարդաշխան օղլի Ասկերովը (ծնված 1960թ.), Շահբազ Ջալալ օղլի Գուլիևը (ծնված 1968թ.) և ինքնությունը չպարզված անձը, կրելով ռազմամթերք ու հրազեն, ապօրինի հատելով Լեռնային Ղարաբաղի Հանրապետության պետական սահմանը, մուտք են գործել Շահումյանի շրջանի վարչական տարածք, հատուկ առաջադրանքով հավաքագրել տեղեկություններ' դրանով իսկ կատարելով լրտեսություն:

Հուլիսի 4­-ին Հավսաթաղ համայնքի վարչական տարածքում տեղակայված «Ճումեն» կոչվող տեղամասից զենքի գործադրմամբ առևանգել են անչափահաս Սմբատ Մեխակի Ցականյանին (ծնված 28.04.1997թ., բն. էր Շահումյանի շրջանի Նոր Էրքեջ գյուղում), ում դիակը հուլիսի 15­ին հրազենային վնասվածքներով հայտնաբերվել է Շահումյանի շրջանի Քարվաճառ և Մանաշիդ համայնքների հարակից անտառահատվածում:

Կազմակերպված հանցավոր խմբի մյուս անդամ՝ Ադրբեջանի քաղաքացի Հասան Հասանովը (ծնվ.1978թ.) հուլիսի 11­ին, ժամը 18:00­ի սահմաններում, Վարդենիս­Քարվաճառ ճանապարհատվածի 32­րդ կիլոմետրին, ազգային ատելության շարժառիթներով, հրազենով դիտավորությամբ ապօրինաբար կյանքից զրկել է ՀՀ Երևան քաղաքի Ա. Սարգսյան փողոցի թիվ 6 շենքի 11 բնակարանի բնակիչ, 1971թ. ծնված Սարգիս Սամվելի Աբրահամյանին, իսկ ՀՀ Կոտայքի մարզի Ձորաղբյուր գյուղի բնակչուհի, 1977թ. ծնված Կարինե Արշավիրի Դավթյանին պատճառել հրազենային վնասվածքներ և ձերբակալման ժամանակ զինված դիմադրություն ցուցաբերելու ընթացքում' վնասազերծվել:

Դիլհամ Գարդաշխան օղլի Ասկերովը և Շահբազ Ջալալ օղլի Գուլիևը ձերբակալվել ու կալանավորվել են: Ընթանում է դատավարություն։