Դատարանը կքննի գործարար Լևոն Հայրապետյանի տնային կալանքը երկարաձգելու հարցը

Մոսկվայի Բասմանյան դատարանը կքննի գործարար Լևոն Հայրապետյանի տնային կալանքը երկարաձգելու հարցը, ով մեղադրվում է փողերի յուրացման և լվացման մեջ «Բաշնեֆտ»-ի բաժնետոմսերի վաճառքի գործով: Այս մասին հայտնել է ՏԱՍՍ-ը:

65-ամյա գործարարը ձերբակալվել է հուլիսի 15-ին Դոմոդեդովո օդանավակայանում, ուր նա ժամանել էր Նիցցայից: Նրան մեղադրանք է առաջադրվել ՌԴ քրեական օրենսգրքի 160 և 174 հոդվածներով:

Հետաքննությունը պնդում է, որ «Բաշնեֆտի» նախկին ղեկավար Ուրալ Ռախիմովը Հայրապետյանի հետ միասին մշակել է Բաշկիրիայի ջերմաէներգետիկական համալիրի ձեռնարկությունների բաժնետոմսերի հափշտակման հանցավոր պլան: Իր հերթին, «Սիստեմա» ֆինանսա-արդյունաբերական խումբ ԲԲԸ-ի համասեփականատեր Վլադիմիր Եվտուշենկովը կազմակերպել է հանցավոր ճանապարհով ստացված ունեցվածքի օրինականացումը:

Հայրապետյանը ձերբակալվել է Բաշկիրիայից նախկին սենատոր Իգոր Իզմեստևի խոստովանական ցուցմունքներից հետո, ով ցմահ ազատազրկման է դատապարտված մի շարք լուրջ հանցագործությունների համար: Նախկին սենատորը պատմել է, որ Հայրապետյանը 2009 թվականին ենթադրաբար մասնակցել է Ուրալ Ռախիմովի կողմից «Բաշնեֆտի» բաժնետոմսերը «Սիստեմայի» կառույցներին վաճառելուն:

Հուլիսի 17-ին Մոսկվայի Բասմանյան դատարանը Հայրապետյանին կալանքի տակ էր դրել, սակայն հոկտեմբերի 3-ին նա տեղափոխվել է տնային կալանքի՝ առողջական խնդիրների պատճառով: Գործարարը չի ճանաչում իր մեղքը և հերքում է նրա դեմ ուղղված բոլոր մեղադրանքները: