Դատավորները «քաղբանտարկյալ» եզրույթը սահմանող բանաձևին անդրադառնալու պարտավորություն չունեն

Գոյություն չունի որևէ միջազգային պահանջ, ըստ որի դատարանները, վճիռ կայացնելիս, պետք է առաջնորդվեն այս կամ այն բանաձևով: Այս մասին Ազգային ժողովում անցկացվող լսումների ժամանակ նշեց ՀՀ արդարադատության նախարարի տեղակալ Արման Թաթոյանը, պատասխանելով ԱԺ մարդու իրավունքների և հանրային հարցերի մշտական հանձնաժողովի նախագահ Էլինար Վարդանյանի այն հարցին, թե դատարանները պարտավո՞ր են վճիռ կայացնելիս հաշվի առնել ԵԽԽՎ «Քաղաքական բանտարկյալի սահմանում» բանաձևում նշված չափանիշները, եթե դատապարտյալն իրեն քաղբանտարկյալ է համարում: «Չկա նման որևէ պահանջ միջազգային փաստաթղթերում, որ դատարաները պարտադիր այս բանաձևին պետք է անդրադառնան կամ այս տեսանկյունից նայեն: Դա պարզապես տվյալ երկրի դատական մարմնի խնդիրն է: Եթե դատական մարմինը գտնում է, որ արդարադատության պատշաճ իրականացման համար իրեն հարկավոր է այս կամ այն փաստաթղթի վերլություն, կվերլուծի»,- «Արմենպրես»-ի հաղորդմամբ՝ նշեց Թաթոյանը:

Նա ևս մեկ անգամ ընդգծեց, որ միջազգային փաստաթղթերում չկա պահանջ, որ գործ քննող դատավորը պարտադիր պետք է անդրադառնա «քաղաքական բանտարկյալ» եզրույթը սահմանող ԵԽԽՎ բանաձևին:

Ազգային ժողովի մարդու իրավունքների և հանրային հարցերի մշտական հանձնաժողովը մարդու իրավունքների միջազգային օրվա կապակցությամբ հրավիրել է խորհրդարանական լսումներ՝ ԵԽԽՎ «Քաղաքական բանտարկյալի սահմանումը» թիվ 1900 բանաձևի կատարման վերաբերյալ: Բանաձևով սահմանվում են քաղաքական բանտարկյալ ձևակերպման չափանիշները: