Հայրապետյանի գործը պետք է կարճվի վաղեմության ժամկետի լրանալու կապակցությամբ կամ համաներմամբ. պաշտպանություն

Գործարար Լևոն Հայրապետյանի պաշտպանությունն այն կարծիքին է, որ նրա քրեական հետապնդումը պետք է դադարեցվի վաղեմության ժամկետի լրանալու կապակցությամբ կամ համաներմամբ: Այդ մասին Մոսկվայի Բասմանյան դատարանում գործարարի տնային կալանքի ժամկետի երկարացման շուրջ նիստի ընթացքում հայտարարել է դատապաշտպանը, տեղեկացնում է «Արմենպրես»-ը՝ հղում անելով ՏԱՍՍ-ին:

Նրա խոսքով՝ Հայրապետյանին մեղսագրվում է հանցագործություն, որը 2003 թվականին կատարվել է «Բաշնեֆտի» նախկին ղեկավար Ուրալ Ռախիմովի կողմից: Այն հետաքննվել է մինչև 2010 թվականը, երբ հետաքննությունը դադարեցվել է վաղեմության ժամկետի լրանալու կապակցությամբ: «Բայց նույնիսկ,եթե ենթադրենք, որ Հայրապետյանը մեղավոր է, ապա նա ենթակա է համաներման»,- ասել է դատապաշտպանը: Ինչ վերաբերում է Բաշկիրիայից նախկին սենատոր Իգոր Իզմեստևի մորից 700 հազար դոլար հափշտակելու մեղադրանքին, փաստաբանը նշել է, որ «հայցվորն ինքն ասում է, որ փ ողերը տվել է ոչ թե Հայրապետյանին, այլ փաստաբան Անտոնովին, որը մինչ այժմ չի հարցաքննվել այդ գործով»:

Բացի այդ, դատապաշտպանը հիշեցրել է, որ Մոսկվայի արբիտրաժային դատարանի որոշմամբ, բաշկիրական ջերմաէներգետիկական համալիրի բաժնետոմսերը վերադարձվել են պետությանը: «Եթե Հայրապետյանն առնչություն ունենար այդ բաժնետոմսերի հետ, ապա հայցը նրա դեմ կներկայացվեր, բայց Գլխավոր դատախազությունը պահանջներ չի ունեցել Հայրապետյանի նկատմամբ»,- ընդգծել է փաստաբանը:

Պաշտպանությունը նաև խնդրել է դատարանին՝ մերժել հետաքննությանը իր պաշտպանյալի տնային կալանքի ժամկետը երկարացնելու հարցում:

65-ամյա ձեռնարկատերը հուլիսի 15-ին ձերբակալվել է Մոսկվայի Դոմոդեդովո օդանավակայանում, ուր նա ժամանել էր Նիցցայից: Հետաքննությունը պնդում է, որ «Բաշնեֆտ»-ի նախկին ղեկավար Ուրալ Ռախիմովը Հայրապետյանի հետ միասին մշակել են Բաշկիրիայի ջերմաէներգետիկական համալիրի ձեռնարկությունների բաժնետոմսերի հափշտակման հանցավոր պլան: Իր հերթին, «Սիստեմա» ֆինանսա-արդյունաբերական խումբ ԲԲԸ-ի համասեփականատեր Վլադիմիր Եվտուշենկովը կազմակերպել է հանցավոր ճանապարհով ստացված ունեցվածքի օրինականացումը:

Հայրապետյանը ձերբակալվել է Բաշկիրիայից նախկին սենատոր Իգոր Իզմեստևի խոստովանական ցուցմունքներից հետո, որը ցմահ բանտարկության է դատապարտված մի շարք առանձնապես ծանր հանցագործությունների համար: Նախկին սենատորը պատմել է, որ Հայրապետյանն իբր 2009 թվականին մասնակցել է Ուրալ Ռախիմովի կողմից «Բաշնեֆտի» բաժնետոմսերը «Սիստեմայի» կառույցներին վաճառելուն:

Դրա հետ մեկտեղ Հայրապետյանի նկատմամբ հարուցվել է ևս մեկ քրեական գործ՝ խարդախության մասին, ըստ որի՝ նա Իզմեստևի մորից 700 հազար դոլար է հափշտակել:

Հուլիսի 17-ին Մոսկվայի Բասմանյան դատարանը Հայրապետյանին կալանքի տակ էր դրել, բայց հոկտեմբերի 3-ին նրան փոխադրել էին տնային կալանքի՝ առողջական վիճակի կապակցությամբ: Գործարարը չի ընդունում մեղքը և մերժում է իրեն առաջադրված բոլոր մեղադրանքները: