Արցախում զինծառայողը մահացել է իրեն ամրակցված նռնակի պայթյունից. Քննչական կոմիտե

ՀՀ քննչական կոմիտեի զինվորական քննչական գլխավոր վարչության առաջին կայազորային քննչական բաժնում հարուցվել է քրեական գործ' հերթափոխի դիտակետում ժամկետային զինծառայող Դավիթ Քոլոյանի մահվան դեպքի առթիվ: 2014թ. դեկտեմբերի 21-ին հաղորդում է ստացվել, որ նույն օրը' ժամը 10:15-ի սահմաններում, N զորամասի մարտական դիրքերից մեկում «արթուն» հերթափոխի դիտորդի պարտականությունները կատարող ժամկետային զինծառայող, շարքային Դավիթ Հրաչյայի Քոլոյանը «արթուն» հերթափոխի դիտակետում իրեն ամրակցված նռնակի պայթյունի հետևանքով ստացած մարմնական վնասվածքներից մահացել է: ՀՀ քրեական դատավարության օրենսգրքի 180-րդ հոդվածի կարգով, հանցագործության հետքեր, այլ նյութական օբյեկտներ հայտնաբերելու, ինչպես նաև դեպքի համար նշանակություն ունեցող մյուս հանգամանքները պարզելու նպատակով կատարվել են դեպքի վայրի, Դավիթ Քոլոյանի դիակի արտաքին, դեպքի պահին նրա հագին եղած զրահաբաճկոնի զննումներ:

Դրանց արդյունքները, ինչպես նաև դիրքի զինծառայողների բացատրությունները բավարար հիմքեր են տվել ենթադրելու, որ նռնակը պայթել է Դավիթ Քոլոյանի գործողությունների արդյունքում:

Նշված փաստով նախապատրաստված նյութերով 2014թ. դեկտեմբերի 22-ին ՀՀ քրեական օրենսգրքի 110-րդ հոդվածի 1-ին մասով նախատեսված հանցագործության հատկանիշներով հարուցվել է քրեական գործ: Քննություն է կատարվում՝ հնարավոր բոլոր վարկածներով: Կատարվում է նախաքննություն, միջոցներ են ձեռնարկվում ապահովելու գործի օբյեկտիվ, բազմակողմանի և լրիվ հետազոտման համար:

Նշանակվել է դատաբժշկական փորձաքննություն: