Հայաստանի քաղաքացիները ՌԴ-ում աշխատելու իրավունքով հավասարեցվել են ռուսաստանցիներին

Հունվարի 2-ից Եվրասիական տնտեսական միության լիիրավ անդամ դարձած Հայաստանի քաղաքացիներն այժմ աշխատելու իրավունքով փաստորեն հավասարեցված են Ռուսաստանի քաղաքացիներին: Այդ մասին, ինչպես տեղեկացնում է «Արմենպրես»-ը, ՌԻԱ Նովոստիին հայտնել են ՌԴ-ի կառավարությունում:

Հայաստանը ԵՏՄ-ին միանալու պայմանագիրն ստորագրել է 2014 թվականի հոկտեմբերին, փաստաթուղթն արդեն վավերացրել են ՌԴ-ի, Բելառուսի և Ղազախստանի խորհրդարանները:

«Բացի այն, որ հայ-ռուսական երկկողմ համաձայնագրի հիման վրա Հայաստանի քաղաքացիներն ազատվում են 30 օրվա ընթացքում միգրացիոն հաշվառման կանգնելուց, նրանք աշխատելու իրավունքով փաստորեն հավասարեցված են Ռուսաստանի քաղաքացիներին:

Այսպես, գործատուներն իրավունք ունեն Հայաստանի քաղաքացիներին աշխատանքային գործունեության մեջ ներգրավել առանց ազգային աշխատաշուկայի պաշտպանության սահմանափակումների հաշվառման»,- նշել են կառավարությունում: Ընդսմին Հայաստանի քաղաքացիներից չի պահանջվում ՌԴ-ում աշխատանքային գործունեություն իրականացնելու թույլտվություն ստանալ:

Ռուսաստանում նաև ճանաչվում են կրթության վերաբերյալ Հայաստանում տրված փաստաթղթերը, ընդսմին կրթության վերաբերյալ փաստաթղթերի ճանաչման՝ օրենսդրությամբ սահմանված ընթացակարգերի անցկացումը պահանջվում է միայն մանկավարժական, իրավաբանական, բժշկական կամ դեղագործական գործունեությամբ զբաղվելու համար: Նաև նշվում է, որ Հայաստանի քաղաքացիները արտասահմանյան անձնագրերով ՌԴ ժամանելիս ազատվում են միգրացիոն քարտ լրացնելու անհրաժեշտությունից, պայմանով, որ Ռուսաստանում նրանց գտնվելու ժամկետը չի գերազանցում 30 օրը:

«Ռուսաստանում Հայաստանի քաղաքացիների և նրանց ընտանիքների անդամների ժամանակավոր կեցության ժամկետը որոշվում է գործատուի հետ կնքված աշխատանքային կամ քաղաքացիական-իրավական պայմանագրի գործողության ժամկետով»,- ճշտել են նախարարների կաբինետում: ՌԴ ժամանման ամսաթվից 90 օր հետո պայմանագրի վաղաժամկետ լուծարման դեպքում Հայաստանի քաղաքացիներն իրավունք ունեն առանց Ռուսաստանի տարածքից մեկնելու նոր պայմանագիր կնքել 15 օրվա ընթացքում: