Վրաստանում Ինտերպոլի կողմից որոնվող ՀՀ քաղաքացի է ձերբակալվել

Վրաստանում Ինտերպոլի կենտրոնական բյուրոյի աշխատակիցները հունվարի 18-ին բերման են ենթարկել Ուկրաինայի իրավապահ մարմինների կողմից որոնվող Հայաստանի քաղաքացի Արտակ Մկրտումյանին: Այս մասին հայտնել է «Նովոստի Գրուզիան»:

Վերջինս փորձել էր Վրաստան մտնել Ռուսաստանից՝ Դարիալի կիրճով:

ՀՀ քաղաքացին հետախուզվում էր 2014 թվականի մայիսի 10-ից՝ Ուկրաինայի քրեական օրենսգրքի 121 հոդվածի առաջին մասով (առողջությանը կանխամտածված վնաս հասցնելը):

«Արտակ Մկրտումյանը 2014 թվականի մայիսի 10-ին Կրիվոյ քաղաքում վիճաբանության ընթացքում դանակահարել էր մի քաղաքացու` նրա առողջությանը ծանր վնաս հասցնելով»,- ասված է Վրաստանի ՆԳՆ-ի տարածած հաղորդագրության մեջ:

Այժմ Հայաստանի քաղաքացին գտնվում է ժամանակավոր պահպանման Թբիլիսիի №1 մեկուսարանում: