Մենք չգիտենք՝ տվյալ անձը Պերմյակո՞վն է, թե՞ ոչ, որովհետև նա չի եղել զինվորական հագուստով. Փոստանջյանը՝ Գևորգ Կոստանյանին

«Այս պահին չկա՞, այո՞, հարուցված քրեական գործ ՀՀ իրավապահների կողմից տվյալ անձի՝ ՀՀ պետական սահմանն ապօրինի հատելու փորձի վերաբերյալ»: Նման հարցով այսօր Ազգային ժողովում Գյումրիում տեղի ունեցած սպանության հարցով կազմակերպված խորհրդարանական լսումների ժամանակ Զարուհի Փոստանջյանը դիմեց ՀՀ գլխավոր դատախազ Գևորգ Կոստանյանին:

«Եվ հենց դա է երևի պատճառը, որ ՀՀ քննչական կոմիտեի կողմից երեկ չհայտարարվեց, որ մենք նաև այդ հիմքով ենք մեղադրանք առաջադրել տվյալ անձին: Միայն հայտարարվեց, որ ՀՀ իրավապահների կողմից միայն սպանության գործով է մեղադրանք առաջադրվել: Որպես ՀՀ գլխավոր դատախազ՝ ինչո՞ւ եք սպասում քննարկումներին, մինչդեռ ակնհայտ է, որ ռուս սահմանապահներն են նրան վերցրել արգելանքի տակ, ձերբակալել, երբ պարտավոր էին ղեկավարվել ՀՀ քրեական, քրեական դատավարության օրենսգրքով: Մենք չգիտենք՝ տվյալ անձը Պերմյակո՞վն է, թե՞ ոչ, որովհետև նա չի եղել զինվորական հագուստով, չի ունեցել փաստաթղթեր: Ռուսական կողմը հայտարարեց, որ իրենք վերցրել են արգելանքի տակ, տեղափոխել 102-րդ ռազմաբազա: Եթե ռուսական կողմը նրան վերցրել է, ապա մեր ԱԱԾ-ն պետք է մասնակից լիներ դրան, որովհետև կարող է Պերմյակովը չէր, մեկ այլ անձ էր: Կան իրավախախտներ: Իրավախախտ է՝ ՌԴ ներկայացուցիչները, որոնք թույլ են տվել ապօրինի փոխանցում տվյալ անձին և որոնց նկատմամբ չունենք քրեական գործ: Մյուսը՝ մեր ԱԱԾ ներկայացուցիչներն են, որոնք թույլ են տվել անգործություն, չեն փոխանցել մեզ, հետաքննչական գործողությունները չեն կատարել, այս առումով ևս պետք է հարուցվի քրեական գործ»,- հայտարարեց Փոստանջյանը՝ հավելելով, որ եթե քրեական գործ չի հարուցվել, ապա ինքն այս պահին հաղորդում է տալիս հանցագործության մասին ու խնդրում ընթացք տալ:

Պատգամավորին ի պատասխան՝ Գևորգ Կոստանյանն ասաց. «Այս հանգամանքը, որ նշեցիք, այն անհրաժեշտ իրավական հիմքերն են, որ պետք է ունենամ, որ դիմեմ փոխանցման համար: Մենք պետք է քննարկենք՝ ա) արդյոք օրինակա՞ն, թե՞ ապօրինի ճանապարհով է հայտնվել ռուս սահմանապահ զինվորականների իրավազորության տակ, բ) արդյոք օրինակա՞ն, թե՞ ապօրինի ճանապարհով է հանձնվել 102-րդ ռազմաբազայի տրամադրության տակ: Այս բոլոր փաստերն ունենալու դեպքում կունենամ բավարար հիմք, որ իմ պահանջը ՌԴ գլխավոր դատախազին լինի հիմնավորված, ոչ թե զուտ պահանջ, զուտ դիմում: Այ, ձեր ասած հանգամանքները պարզելու արդյունքում, երբ ձեռք կբերենք ապացույցներ, կդիմենք»:

Զարուհի Փոստանջյանը տեղից ճշտող հարց հնչեցրեց, թե նշանակում է, որ մեզ համար պարզ չէ՞:

«Պարզ լինելը, ակնհայտ լինելն այլ է, փաստն այլ է: Քննության արդյունքում պարզ կլինի՝ ով ինչ պարտավորություններ ուներ, որը չի կատարել: Այս ամենը պարզելու արդյունքում համապատասխան պատասխանատվության հարց կբարձրացվի սուբյեկտներից յուրաքանչյուրին: Եվ սա բավարար կլինի, որ իմ դիմումը ՌԴ գլխավոր դատախազին լինի պատճաբանաված»,- պատասխանելով՝ ասաց Կոստանյանը: