Միհրան Պողոսյանը բանկերի կողմից քաղաքացիների ողջ ունեցվածքի վրա կալանք դնելը ԴԱՀԿ բացթողումն է համարում

ՀՀ գլխավոր հարկադիր կատարող Միհրան Պողոսյանը 2014թ. ծառայության ամենալուրջ բացթողումը համարում է քաղաքացիների ողջ ունեցվածքի վրա բանկերի կողմից դրված կալանքը: ԴԱՀԿ 2014թ. գործունեության արդյունքների վերաբերյալ ամփոփիչ ասուլիսի ընթացքում Միհրան Պողոսյանը նշեց, որ դա ամենալուրջ բացթողումն էր, ինչի հետևանքով բազմաթիվ քաղաքացիներ լուրջ խնդիրների առաջ էին կանգնել: «Խնդիրն առաջացավ ամռան ամիսներին, երբ մարդիկ ակտիվ հանգստի մեջ էին: Բանկերը չնչին պարտքերի համար կալանք էին դնում մարդկանց ողջ ունեցվածքի վրա: Սա իսկապես լուրջ խնդիր էր, որն առաջացավ ԴԱՀԿ-ի, ինչպես նաև բանկերի մեղքով»,- «Արմենպրես»-ի հաղորդմամբ՝ նշեց նա:

Միհրան Պողոսյանի խոսքով՝ այդ բացթողումը եղավ այն պատճառով, որ թե ԴԱՀԿ-ն, թե բանկերը ժամանակին չեն քննարկել այդ հարցը, ուշադրություն չեն դարձրել, չեն հասկացել, որ որոշ ժամանակ հետո կարող է նման խնդիր առաջանալ: Նա ընդգծեց, որ տվյալ դեպքում քաղաքացիները որևէ մեղք չունեին, և ամբողջ պատասխանատվությունը ԴԱՀԿ-ի և բանկերի վրա էր:

ՀՀ գլխավոր հարկադիր կատարողը գոհունակությամբ նշեց, որ իրենք կարողացան արագ արձագանքել և լուծել խնդիրը: «Փառք Աստծո, որ մենք կարողացանք ժամանակին արձագանքել և շատ արագ կարգավորել առաջացած խնդիրը, որը բազմաթիվ քաղաքացիների դժգոհության առիթ էր հանդիսացել»,- նշեց նա: