Մոսկվայի դատարանը փետրվարի 9-ին քննության կառնի Լևոն Հայրապետյանի բողոքարկումը

Մոսկվայի քաղաքային դատարանը փետրվարի 9-ին քննության կառնի հայազգի գործարար Լևոն Հայրապետյանի տնային կալանքի երկարաձգման դեմ ներկայացված բողոքարկումը: Այդ մասին, ինչպես տեղեկացնում է «Արմենպրես»-ը, ՏԱՍՍ-ին հայտնել է Բասմանյան դատարանի մամուլի քարտուղար Աննա Ֆադեևան:

Ավելի վաղ Բասմանյան դատարանը ձեռնարկատիրոջ տնային կալանքը երկարացրել է մինչև ապրիլի 19-ը: Գործով քննության ժամկետը երկարացվել է մինչև ապրիլի 28-ը:

65-ամյա Հայրապետյանը դրամական միջոցների վատնման և լվացման մեջ է մեղադրվում «Բաշնեֆտի» բաժնետոմսերի վաճառքի գործով: Նա ձերբակալվել էր 2014 թվականի հուլիսի 15-ին «Դոմոդեդովո» օդանավակայանում, ուր ժամանել էր Նիցցայից:

Նրան մեղադրանք է առաջադրվել ՌԴ քրեական օրենսգրքի 160-րդ և 174-րդ հոդվածներով («Ուրիշի ունեցվածքի յուրացումը կամ վատնումը և անօրինական ճանապարհով ձեռք բերված միջոցների լեգալացումը»):

Հետաքննությունն այն կարծիքին է, որ «Բաշնեֆտի» նախկին ղեկավար Ուրալ Ռախիմովը, որը նույնպես անցնում է այս գործով, Հայրապետյանի հետ համատեղ մշակել է Բաշկիրիայի վառելիքաէներգետիկական համալիրի ձեռնարկությունների բաժնետոմսերի հափշտակման հանցավոր պլան:

Հայրապետյանը ձերբակալվել է Բաշկիրիայից նախկին սենատոր Իգոր Իզմեստևի խոստովանական ցուցմունքներից հետո, որը ցմահ բանտարկություն է կրում մի շարք առանձնապես ծանր հանցագործությունների համար: Դրա հետ մեկտեղ, գործարարի նկատմամբ ևս մեկ քրեական գործ է քննվում խարդախության վերաբերյալ: Այն հարուցվել է նախկին սենատոր Իզմեստևի մոր հայտարարության հիման վրա, որը Հայրապետյանին մեղադրել է իրենից 700 հազար դոլար հափշտակելու մեջ: